Shillong, Rymphang 28
U Chief Executive Member (CEM) bathymmai ka Khasi Hills Autonomous District Council (KHADC), Bah Shemborlang Rynjah, u la ong ba ka Executive Committee kaba la pynïaid da ka Voice of the People Party (VPP) ka thong kaba nyngkong ka long ban wanrah ïa ka jingpynbeit ryntih ïa ka jingtreikam ha ophis KHADC.
Haba ïakren bad ki nongthoh khubor hadien ba la dep bamsmai kum CEM, u Bah Shemborlang Rynjah u la ong ba ka EC kan ym ai laisen khaïi shuh sha ki bar jylla lada don ki khasi kiba la lah ban trei khnang ba ki samla kiba ïeng ha ki kjat kin ym duh jingkyrmen.
Haba ïadei bad ka Building bye-laws un dang pynkhreh ban pynjanai namar kane ka la pynthut ïa ki paidbah namar ki longïing baduk kim lah kot bor ban shna ïing haba ka la rem ka bai shim jingbit.
Shuh shuh, u la ong ba un dang pynbit pynbiang ha ka khyndew ka shyiap, ka riti dustur bad ban pynneh-pynsah ïa ka mariang.
Haba ïadei bad ka rukom thungkam, un sa wanrah ïa ka rukom thungkam kaba ryntih khnang ba ki khun samla kiba dei hok kin ïoh kam bad kam don shuh ka jingthungkam katba mon.
Haba ïadei bad ka jingthung ïa ki Executive Member tang hynñiew ngut, u Bah Shemborlang u la ong ba kane la dep pynbeit da ka seng ban ym pynlut kai ïa ka pisa paidbah, kumta u kyrmen ba ki MDC kim dei ban sngeweiei ïa kata namar kumba ka seng ka ïeng halor ka nongrim.
