Shillong, Rymphang 28
Ha kawei ka jingjia shah pynïap kaba la jia ha ka step phyrngab jong ka 28 tarik u Rymphang, kawei ka longkmie ïa kaba la tip kyrteng kum ka Kong Damonica Laloo, 41 snem ka rta kaba shong ba sah ha Lawsohtun ka la suba shah pynïap ha kawei ka dukan die-bam kaba don hajan ka KJP Assembly Building mar pyrshah bad ka U Soso Tham Auditorium.
Katkum ka kyrwoh ba la pyntip da u Superintendent of Police (SP) ka East Khasi Hills, Bah Vivek Syiem, u la ïathuh ba ha ka por 10:20 baje mynstep jong ka 28 tarik u Rymphang, 2025, ki pulit jong ka thanat Sadar ki la ïoh jingtip na u trai jong ka Trattoria Restaurant ba kawei ka nongtrei kynthei jong u la suba shah pynïap ha ka bynta ba shapoh jong katei ka jaka bam.
U Bah Vivek u la ïathuh ba ka kynhun jong ki pulit na thanat Sadar bad ka FSL Crime Scene Unit ki la leit mar-mar sha katei ka jaka ban pynlong ïa ka jingtohkit halor katei ka jingjia.
U la ïathuh ba katkum ki sakhi-sabut ba la ïohlum da ka jingïarap jong ka kynhun FSL bad ka Crime Scene Unit, la lap ksai ba u briew uba donkti ha kane ka kam pynïap u dei ba la tip kyrteng kum u Sunai Singh, 42 snem ka rta bad u dei ruh uba ïatreilang bad katei ka longkmie ha katei ka dukan bam.
Shuh-shuh, u Bah Vivek u la ïathuh ba ha ka jingtohkit da ki bor pulit, u Sunai Singh u la phla ba u la donkti ban pynïap ïa katei ka longkmie hadien ka jingïamai-jingïatim kaba jur bha bad katei ka longkmie ha ka 27 tarik u Rymphang 2025 ha ka por kumba 11 baje mynmiet da kaba pyndonkam da u pipe nar ba jylliew ban bom ïa ka.
Utei u briew u la phla ruh ba u la leh ïa kane ka kam ha ka por ba u la shoh khawiang bad u la phla ruh ha ki bor pulit ba u la ïaleh ban buhrieh ïa ka met jong katei ka longkmie hajan jong u Transformer jong ka KJP Assembly Conference Centre.
Na ka liang ki bor pulit, ki la kurup noh ïa baroh ki sakhi-sabut ba la ïohlum na katei ka jaka ha ryngkat u pipe nar ba la pyndonkam ban pynïap ïa katei ka longkmie.
Ka jingtohkit kaba kham bniah da ki bor pulit halor kane ka jingjia ka dang ïaid shakhmat ban dang lap ksai ïa baroh ki jingïadei bad katei ka kam.
Ïa ka metïap jong katei ka longkmie la pynkit noh sha NEIGRIHMS Hospital ban leh ïa ka Post Mortem ha ka 1 tarik u Lber, 2025.
Halor kane ka jingjia, la dep ban pynrung ruh ïa ka mukotduma pyrshah ïa utei u briew ha Sadar PS bad la kem noh ïa u bad shen yn sa tian bishar ïa u hakhmat ka kashari.
Haba ïoh ban ïakren bad u Bah Welcome Dkhar uba dei u kurim jong katei ka longkmie, u la ïathuh ba u la ïashong bad katei ka kurim naduh u snem 2012 hynrei mynta la kumba saw snem eiei ki khlem ïashong-ïasah shuh ryngkat.
U Bah Dkhar u la ïathuh ba katei ka kurim jong u ka dei kaba trei-ktah ha katei ka dukan bad ka ju sah ruh ha katei ka dukan.
U la ïathuh ba ma u bad katei ka kurim ki don tang iwei i khun i ba la 11 snem ka rta.
Shuh-shuh, u la ïathuh ruh ba ha ka 27 tarik u Rymphang, 2025, kumba katto-katne kynta eiei ha shwa ba katei ka longkmie kan shah pynïap, u dang shu dep ban ïakren phone bad katei ka kurim jong u. U la ïathuh ruh ba dang ha ki khyndiat sngi kiba dang shu dep, ma u bad katei ka longkmie ki dang ïasah lang ryngkat hynrei hadien kumba shitaïew eiei, katei ka kurim jong u ka la leit ban sah noh ha katei ka dukan-bam.
