Nongstoiñ, Rymphang 28
Ka Khasi Students’ Union (K.S.U) West Khasi Hills District ha ryngkat ki nongïalam shnong ka thaiñ Kyrshai ha ka 28 tarik u bnai Rymphang ka la leit ban ujor sha u Deputy Com-missioner ka West Khasi Hills halor ka jingwan pynibor jong ki briew na Assam ha ryngkat ka jingsynran ki pulit ïa ki nongshong shnong jong ka Umthli, Umdieng-phiang, Umdiengsiar, Umbah , Dariphang, Borkhuli, Dalidongna, Mawiamsyiem, Maw-diangkop ban pynbor ‘register’ ïa ki jaka sha ka Assam.
U samla Johnfisher Nongsiang, President ka KSU, WKH u la ong ba kane ka jingwan pynibor ki briew na Assam ka la jia bunsien, kata ha ka 2 tarik Kyllalyngkot, 2025, ha ka 25 Rymphang, 2025 bad ha ka 27, Rymphang 2025.
U la ong ruh ba kine ki shnong ki don ïa ki dulir ba la dep ‘register’ hapoh ka Hima Nongmynsaw bad ha Khasi Hills Autonomous District Council bad kiba hap hapoh Kyrshai Police Outpost, West Khasi Hills District.
U la ong ruh ba ka jingpynbor ban ‘register’ noh ïa ki jaka jong kitei ki shnong ha Assam ryngkat ka jingpyntieng kohtympan ban pynthut ïa ka shongsuk shongsaiñ ha kitei ki jaka khappud lada ym kohnguh, ka ïai bteng na kawei ka por sha kawei pat kaba la wanrah ïa ka jingsyier ïa ki paidbah nongshong shnong.
U la ong ruh ba ka seng KSU lyngba u DC ka dawa na ka Sorkar ban shimkhia mardor ïa kane ka bynta bad ban pyntikna ba ka Assam ka dei ban sangeh mardor ïa kum kine ki jingleh donbor da kaba burom ïa ka rai jong ka Sorkar Meghalaya bad Assam katba dang ïaid ka jingïa pynbeit pud.
