Shillong, Rymphang 28
U President bad MLA ka Voice of the People Party (VPP), Bah Ardent M. Basaïawmoit ha ka Sngi Thohdieng u la kren shai ba ka seng kan sa shim ïa ka rai halor ka bynta ba ïadei bad u MLA ka North-Shillong, Bah Adelbert Nongrum.
“Ym tang ki nongïalam hapoh ka seng, hynrei ïa kane la ïohi da ki paidbah hi kum ki kam pyrshah seng bad ka seng kan sa shim ïa ka rai halor kane,” ong u Bah Basaïawmoit haba jubab la ka seng ka la shim ne em kano-kano ka rai ne shim ïa ki jingleh u Bah Adelbert Nongrum kum ki kam pyrshah seng.
Haba kylli kiei ki sienjam kiba ka seng kan shim haba ïadei bad kane ka bynta, u la ong, “Ka seng kan sa shim ïa ka rai…ngin sa ïathuh sha phi ha ka por kaba biang.”
Kum ban shu kdew hangne, artaiew mynshuwa, kawei ka durkhih ka la saphriang ha ki rynsan lad pathai ha kaba u MLA ka VPP na North-Shillong, Bah Adelbert Nongrum, u la kren shaphang ka seng ha ryngkat ka jingdonlang jong kiwei de ki ‘riew rangbah.
Halor ka ‘Article 371’, u Bah Basaïawmoit u la ong ba u la kob ban tyrko nia haba ïadei bad kane ka mat bad ki la don katto-katne ki ‘channel’ kiba long la kloi ban shim ïa ka sienjam ha ka ban pynlong ïa kane ka tyrko nia hapdeng jong u bad ki nongsaid aiñ.
Haba kylli lah ne em ban don baroh 2 tylli (District Council bad ‘Article 371’), u la ong, “Haba phi kwah pan ïa kaei-kaei nangno-nangno, kaba nyngkong eh phi donkam ban tip kaei ka jingdonkam jong phi, kaei phi kwah.”
“Lada kane ka dei ka rukom pyrkhat ne jingsngewthuh jong kito ki nongïalam kiba la ïakhun ban pynïoh Jylla lajong na bynta jong ngi, te kajuh ka jingkylli lah ban kylli na bynta kito ki nongïalam, balei phi kwah ïakhun ban ïoh Jylla lajong haba phi la don ïa ka District Council…hato ngim tieng ïoh ngi duh ïa ka District Council na bynta ban ïoh Jylla lajong,” la buh jingkylli une u nongïalam.
