Shillong, Lber 02
Ki don palat 5 lak tylli ki longïing ha ki jaka nongkyndong kiba la biang ka umbam-umdih lyngba ka Jal Jeevan Mission (JJM).
“Ban pynïoh ïa ka umdih kaba khuid bad suba sha baroh, la pynbiang um lyngba ki Functional Household Tap Water Connection (FHTWC) sha palat 5.2 lak tylli ki longïing nongkyndong hapoh ka JJM,” ong u Lat ka Jylla, u C.H. Vijayashankar ha ka jingkren jong u ha ka sngi sdang jong ka Dorbar Mang Tyngka.
Haba kdew ba ka Jylla ka la kiew bha ha kine ki khyndiat snem, u la ong ba na ka 0.72% ka jingpynbiang um ha u snem 2019, ka jingpynbiang um ka Sorkar Jylla sha ki longïing haduh u bnai Kyllalyngkot mynta u snem, ka long 81%, kaba long palat ïa ka jingkheiñ jong ka ri baroh kawei.
“Baroh ki don 4,024 tylli ki shnong kiba la biang ïa ka jingpynïasoh um kor ne ka jingpoi um ha ïing (kaba 100%), kaba pynlong ïa ki kum ki shnong ‘Har Ghar Jal’,” u la ong.
U Lat u la ong ruh ba ha ki jaka ba ki tyllong um ki tyrkhong namar ka jingkylla suiñbneng, ka Sorkar ka la shimkhia ban pynkhie im biang ïa ki kumjuh ban thaw shuh ïa ki jaka pynlang um.
Haba kdew ba ka nongrim ba kongsan jong ka JJM ka long ban pyntikna ïa ka um kaba paka sha ki nongshong shnong, u la ong ba la wanrah ïa ka ‘Laboratory’ peit bniah (ïa ka jinglong-jingman ka um) ba nyngkong eh ka Jylla ba la ithuh da ka NABL ha Mawïong, East Khasi Hills.
Shuh shuh u la bynrap ba la pynïeng sa 30 tylli ki ‘Laboratory’, ha ki kyrdan jong ki distrik bad Sub-Division, ban pyntikna ïa ka jingbha jong ka um-dih.
Nalor kane, la pyntreikam ruh ïa ki skhim sam um kiba heh ha Shillong, New Shillong, Williamnagar, Nongstoiñ, Ampati, bad Tura.
