Shillong, Lber 02
Ki nongrep synsar na ka thaiñ Mynriang kaba hap hapoh ka Mawryngkneng C&RD Block ki la kyrpad ïa ka Sorkar ba kan thied lut ïa u synsar na ki nongrep hynrei ym ban shu thied tang 800 kilo tang na uwei-pa-uwei nongrep namarba kane kan buh jingeh hi ïa ki nongrep ban pynïaid ïew ïa u synsar uba tam uba ka Sorkar kam treh ban thied.
Kane ka rukom leh jong ka Sorkar ka la pyndiaw mynsiem ïa ki nongrep namarba ïa u synsar uba tam shaei pat kin leit ban die.
Shwa kane, ka kynhun ki nongrep na ka thaiñ Mynriang ki la pynsngew sha ka ophis jong ka Deputy Commissioner ka East Khasi Hills ha ka 6 tarik, Rymphang, 2025 da ka jingkyrpad ban shimkhia lem ïa ka jingeh jong ki nongrep namar ka jinghiar dor jong u synsar. Na ka liang ka ophis jong ka Deputy Commissioner ha ka 10 tarik Rymphang, 2025 ka la bthah ïa ki nongrep synsar ban ïakynduh ïa ki ophisar jong ka tnat rep ka riang.
Ha u kyrwoh ba la phah da u Bah JJ Lyngkhoi bad kiwei kiwei ki para nongrep na ka thaiñ Mynriang ryngkat ki dur ba la ïakynduh ïa u Horticulture Development Officer jong ka Mawryngkneng C&RD Block u Bah David Lyngdoh, u la ong ba une u ophisar u la batai ba ka Sorkar ka la pynkhreh ïa ki ar tylli jaka thied synsar na ka bynta ki nongrep synsar hapoh ka Mawryngkneng C&RD Block, kata ha Polahier bad Puriang bad ka Sorkar ka la kular ban thied ha ka dor T.55 shi kilo khlem da ot kilo.
Na ka liang jong ki nongrep synsar ki la pyntip ruh ba kin sa leit ban ïakynduh ruh ïa ka Myntri jong ka Sorkar Jylla kaba khmih ïa ka rep ka riang ban ïakren halor ka dor ka mur kaba ktah haduh katta-katta ïa ki nongrep synsar.
Shuh-shuh, ki nongrep ki la ïohlad ruh ban pynsngew ïa kane ka jingeh ha ka Block Development Officer jong ka Mawryngkneng C&RD Block ka Richa Kulkarni kaba la kular ban tuklar lem halor kane ka kam.
“Ka BDO ka la kular ban kan sa wad ïa ki lad ki lynti ban ïarap ïa ngi ki nongrep namarba ka Sorkar kan thied tang 800 kilo u synsar tang na uwei u nongrep, kan buh jingeh shikatdei eh ïa ngi namar shaei ngin leit die ïa u synsar uba tam nalor ba ka dor die ha ïew ha hat ka long ha ka dor kaba tad,” la ong u Bah Lyngkhoi.
