Shillong, Lber 02
Namar ka jingwan jong ka aïom jur lyer kaba lah ban ktah ha kiba bun rukom ïa ki nongshong shnong, na ka liang jong ka Deputy Commissioner (DC) ka East Khasi Hills ka Kong R.M Kurbah ka la pynmih ki jingbthah bad kumno ban shim ki lad jingïada.
Ha ka kyrwoh khubor la ong ba namar ka jingsdang jong ka aïom jur lyer ki paidbah ki dei ban shim ïa ki lad ai jingïada, kata ban da khmih bniah ïa ki ïing ki sem, ban pyndait skhem ïa ki bynta ba la synjor kum ki saraw tnum ïing lane ki maw-it bad maramot ïa ki jingkhang bad ki khalki.
Kumjuh ban pynkynriah lane pom noh ïa ki tnat dieng ba la ïap lane ki dieng ba la sdang ïaptram kiba don hajan ki ïing, ban kiar na kino-kino ki jingjia ba sngewsih khamtam kum ki jingpluh ding, ban phah khmih bha na ki briew ba tip shaphang ki sainar ilektrik bad ka jingring ding ilektrik ha ki ïing ki sem.
Nalor kane, ban buh pynskhem bha ïa ki mar ba lah ban shah rong ha ka lyer kum ki thup dieng, ki tin sop ïing, ki thup maw-it, ki mar ba thep ïa ki ñiut ki ñier, ki sign boards bad kumta ter ter kiba lah ban shah rong ha ka lyer kaba jur bad kumjuh lada don kano-kano ka jingjia pluh ding, ki paidbah kim dei ban tieng ne syier lane ban khihwin. Ki longïing longsem kiba shah ktah, ki dei ban kynriah noh sha ki jaka ba kham shngaiñ.
