Nongstoiñ, Lber 02
Da ki phew hajar ngut ki paid Khristan ka Balang Presbyterian na kylleng ki jaka ki la wan ban sakhi bad ïa shim bynta shitrhem ban shakri lang ïa U Blei ha ka Jing-ïaseng Samla KJP Synod Sepngi kaba arphew lai kaba la long ha ka Balang Presbyterian Nongstoiñ ha ka Sngi U Blei.
Ha katei ka jingïa-seng, nalor ki nongkitkam jong ka Jingïaseng Samla KJP Synod Sepngi, la donlang ki Pastor, ki nongmihkhmat ka Jylla kynthup ki MDC bad MLA bad kiwei kiwei. Ha shuwa ban sdang ïa ka jingïaseng la ïoh ïa ka jingrwai ‘Revival’ na ka Standing Choir Tynghor bad la ïalam jingrwai bad tem da ka Standing Choir Jingïaseng Samla KJP Synod Sepngi bad la ïoh ruh ban pule na ka ktien u Blei bad duwai na u Bah Jeffer Nongsiej.
Ha ka jingïaseng ha ka por 10.30 mynstep, la ïoh ïa ki jingrwai na ki Choir ba kynthup na ka Jingïaseng Khynnah Balang Nongstoiñ, Standing Choir Rangthong Presbytery, Standing Choir Ri Lyngngam Presbytery, Standing Choir Mawshut Presbytery bad Standing Choir jingïaseng Samla KJP Synod Sepngi.
U Rev. L Nongrud haba kren bad ïalap ïa ka ktien ka jong U Blei ha ka jingïaseng mynstep, u la kren halor ka phang “Ïoh ba ngi klet” ïa kaba u la pynshong nongrim ïa kane ka phang na ka ktien ka jong U Blei na ka Jingrwai Salm lynnong 9 bad dkhot 17.
U Rev. Nongrud u la ong ruh ba u Syiem David u rwai ïa kane ka jingrwai da kaba ong ba ka jaidbynriew kaba klet ïa U Blei kan poi dujok. Ka jaidbynriew kaba klet ïa U Blei kan jot, ka jaidbynriew Israel ka dei ka jaidbynriew kaba tip ïa U Blei hynrei bunsien ka klet ïa u. Bunsien ka ïaid lait ïa ka mon jong u, bunsien u shah shet kylla ha kane ka jaidbynriew.
“Ka jaidbynriew Khasi jong ngi ka dei ka jaidbynriew kaba la tip kum ka jaidbynriew tip-briew tip-blei, hooid, ka long kaba shisha kaba U Blei u ieit kyrpang ïa ka jaidbynriew Khasi ka jong ngi, u da theh ruh kyrhai ki jingkyrkhu, u da kyrkhu kyrhai ïa ngi ka jaidbynriew, ha kiwei ki jaidbynriew don shibun ki briew kiba ïap thngan hynrei ha ka jaidbynriew Khasi jong ngi phin ym shym ba don kiba ïap thngan, ki lah ban don lehse kiba ïap tyrsaw lehse hangne-hangtai hynrei don bun pynban kiba ïap kdang,” ong u Rev. L Nongrud.
U la ong ruh ba bun kiba ïap ha ka bam ha ka dih, bun kiba ïap kdang, u David ha ka Salm 103 u pynpaw ka jingsngewnguh ïa U Blei u ong, ‘Ko mynsiem jong nga to kyrkhu ïa U Trai bad baroh kaba ha nga ïa ka kyrteng kaba khuid ka jong u bad wat klet ïa ki jinglehbha ki jong u baroh.’
U la ong ruh, “Kane ka jylla ka jong ngi, ka jaidbynriew Khasi lyngba kine ki snem ba la dep ki don kiba la ai nam ïa kane ka jylla da kata ka Christian State hynrei lada shu peit mynta shen yn sa nam noh da ka ‘gambling state’, ki khalai kiba man ka sngi.
“Dap tang ka jingkhalai suda man ka sngi, ki jingthoh tim kaba man ka sngi bad kaba phylla eh ka long ba ki briew ki ïa pynleit jingmut ha kane ka thoh tim,” u la ong.
U Rev. Nongrud u la pynpaw ruh “Don ki briew kiba bynda noh ïa ki jingdon jingem ki jong ki ïa ki ïing ki sem ki jong ki ha kane ka jingkyrni ha ka khalai, ki jingpynïatur masi kaba da ki phew phew lak kylleng ka ri Khasi, nangta ki jingïakop khwai, bad ha kine ki jingïakop khwai ki don kiba ïapeiñ noh ka bai khaw khun sha kaba siew noh ïa ka bai rung leit khwai”.
U la ong ba mynta lei-lei nalor ki jait jingkhalai bapher bapher, mih sa ka khalai Ludo, ha ïing ruh long ha surok ruh long, hapoh taksi ruh long, ha kaba kiba bun ki klet noh ïa ki kam ki jam namar ba la kyrni ka khalai Ludo.
Shuh-shuh, u la ong ruh ba ki longïing longsem ki pait ki pra, ki jingïaphet kurim, ki jingïapyllait san shyieng ki jur bha ha kine ki sngi bad kaba sngewsih ka long ba ka Jylla ha ka jingïapyllait san shyieng ka wan ba lai ha North East.
U la ong ruh ba ka akor ka burom ka hiar syndet ha kane ka juk kaba mynta, la rung ka akor phareng la jah ka akor Khasi, la rung ka sngew phareng, la rung ha ka ïaid ka im, ka riam ka beit, ka bam, la jah ka la jong.
U la ong ruh ba ka synshar ka khadar, mynshuwa ki Khasi ki pynïaid ïa ka synshar ka khadar da kata ka dorbar Blei, ki da ñiew kyntang ïa ka dorbar, lada don kumno-re-kumno kiba kren khlem akor hapoh dorbar lane kiba buaid tanglang hapoh dorbar ki ju sei noh shabar hynrei mynta pat bun kiba leit dih kyiad shuwa khnang ban shlur ban kren dorbar, ka synshar ka khadar la pher lut ka jingsngew kyntang ka la ïap noh ka jingïatip lem ha ki dorbar Blei.
Ha kane sngi, ha ka jingïaseng kaba ar sien ha ka por 1.30 mynsngi u Rev. E.L Kharmawphlang u la shim ïa ka bynta ban sam ïa ka khubor na ka ktien jong U Blei.
