Shillong, Lber 02
Hadien ba na ka liang u Myntri Rangbah ka Jylla, u Conrad K Sangma ula kubur ban pynkiew noh ïa ka bai bylla jong ki nongtrei bylla sngi kiba don ha ki tnat treikam bapher-bapher jong ka Jylla ïa kaba la ïohi ba kala jia shisha kumta hajan baroh ki tnat treikam hynrei kaba phylla ka long ba ki Muster Roll ne ki nongbylla sngi kiba don hapoh ka Mawphlang PHE Electrical Division kim shim la ïoh satia ïa kane ka jingsiew kaba thymmai, bad ki skill ruh ki ïoh ïa ka area kaba tang T.27. Kumta halor kane, na ka liang ki nongtrei ki la pynpaw ïa ka jinglyngngoh kaba khraw halor kane ka jingban beiñ ïa u rit-u ria da ki bor ba halor kiba dei peit ïa kane ka tnat treikam. Kitei ki nongtrei ki la byrngem ruh ba lada ka Sorkar Jylla kam shimkhia mardor haba ïadei bad kane ka bynta, na ka liang jong kitei ki nongtrei kin sa leh ïa kaba donkam ban leh da kaba pynpaw ruh ba kum ki nongtrei kim ju ïoh ïa ka tulop ha ka por kaba biang bad ka jingshah set tulop ruh jong kitei ki nongtrei ka ju jia khah-khah.
“Kumta ngi na ka liang ki nongtrei ka Mawphlang PHE Electrical Division ngin sa leh ïa kaba donkam lada ngim ïoh ïa ka ba dei hok ban ïoh, nalor kata kum ki nongtrei ngim juh ïoh ïa ka tulop ha ka por kaba biang bad la shu set tulop katba ki mon namar ba ki don ha ka bor”, ong kitei ki nongtrei.
Ki la ong ba kum ki nongtrei kim dei shuh ki biej-ki them ban shu sngap katba ki bor ba halor ki leh hynrei ki don ïa ka hok ban ïaid shakhmat ha ka ban pynsngew lem sa sha kiba kham halor shuh-shuh ban ïa ki.
