Shillong, Lber 02
U MDC ka NPP na Bataw-Lakadong, Dr. Sankey Shangpung uba dang shah jied biang kum u Shongknor ka ïingdorbar ka Jaiñtia Hills Autonomous District Council (JHADC) u la ong ba um don jingtip balei ki 8 ngut ki MDC ka Voice of the People Party (VPP) ki khlem wan ïashim bynta haba jied ïa u Chief Executive Mem-ber (CEM) ha ïingdorbar.
Haba U Nongsaiñ Hima u ïoh ban ïakren bad u Dr. Sankey Shangpung lyngba ka phone, u la ong lada kim lah ban ïathep vote ruh ki MDC ka VPP ki dei ban ïashimbynta haba ai khublei ynda la dep jied ïa u CEM namar ka council ka donkam ïa u nongïalam ban pynïaid ïa ki kam ki jam.
U la pynpaw ka jing-sngewdiaw haba mar shu sdang ka dorbar ki MDC ka VPP kim treh ban ïashimbynta ban jied ïa u CEM ba kim don jingkitkhlieh ïa ka bha ka miat.
Na ka liang ka NPP bad ka UDP kiba ïatrei-lang ban thaw ïa ka Executive Committee ha Jaiñtia Hills Autonomous District Council (JHADC) ki la phah biang ïa u Dr. Sankey Shangpung ba un shimti biang ïa ka shuki Shongknor jong ka ïingdorbar.
Kane ka jingjied biang ïa u Dr. Sankey ka long namar u dei uba tbit ban pynïaid ïa ka dorbar ha kine ki san snem ba la dep bad u dei ban pynïaid biang mynta ka samoi, namar ki MDC liang pyrshah ki dei kiba khlaiñ haba ka VPP ka la jop haduh 8 ngut bad ka Congress kaba jop 3 ngut ki MDC ki shong ha liang pyrshah.
U la pynpaw ruh ba u kwah ban bat noh kum u Executive Member ha JHADC haba ka NPP ka la wan biang ha ka bor synshar hynrei ki la ai jingmut ba un hap ban bteng biang ban bat ïa ka kam shongknor namar u lah ban pynïaid ïa ka dorbar haba ka liang pyrshah ka dei kaba khlaiñ.
U la ai khublei ïa ki paidbah jong ka Bataw-Lakadong kiba la jied biang ïa u ha kane ka ilekshon uba la ïeng na ka NPP.
