Shillong, Lber 02
Palat 700 ngut ki nongseng kam lajong jong ka Jylla ki la ïoh jingkyrshan lyngba ka Meghalaya Home Stay Scheme (MHSS).
Haba kdew ba ka Sorkar Jylla ka la ai kyrdan karkhana ïa ki kam jngoh kai pyrthei hapoh jong ka Meghalaya Industrial and Investment Promotion Policy, 2024, u Lat ka Jylla, C.H. Vijayashankar ha ka jingkren jong u ha ka sngi sdang jong ka Dorbar Mang Tyngka, u la ong ki nongseng kam lajong mynta ki la ïoh ïa ki jingïarap bad ki lad jingpynshlur kiba khring ha ka liang ki kam jngoh kai pyrthei.
U la ong ruh ban kyntiew shuh-shuh ïa ka roi ka kiew jong kane ka tnad bad ka lad kamai, ka Sorkar ka la pyrshang ban pynbun ïa ka jingdon jong ki jaka sah bad ban kyntiew ïa ka ‘Experiential’ bad ‘Niche Tourism’ kumjuh ïa ka ‘Adventure Tourism’.
“Haduh mynta, ki don 710 ngut ki nongseng kam lajong na kylleng ka Jylla kiba la ïoh ïa ka jingkyrshan na ka MHSS, kaba ai jingïarap 70% sha ki nongseng kam lajong,” u la ong. U la kdew ruh – ban kyntiew ïa ka kam jngoh kai kaba pynleit jingmut ïa ki nongwan jngoh kai kiba kham pynlut pisa ne ka ‘High Value Tourism’, la dep ban mang ïa 100 tylli ki kali hapoh ka skhim Prime Vehicle Tourism.
“Kum shi bynta jong ka Meghalaya Eco Tourism Infrastructure Development Project, la ïaid shakhmat bad ki jingthmu bapher-bapher, kum ka jingtei ïa ki jaka sah ha ki jaka bapher-bapher kiba donkam, ka jingpynroi ïa ka jaka jngoh kai pyrthei bad ka Shillong Ropeway Project,” ong u Lat.
Haba phai sha ka ‘Public-Private Partnership Model’, u la ïathuh ba la pyndonkam bha ïa kane ka bynta ban kyntiew ïa ki jingtei ha ka kam jngohkai pyrthei kynthup ban buh ïa ki jaka sah ba kham bha ne ki ‘5-star Luxury Resort’ ha Sohra, New Shillong bad Umïam. Dang shen, ka Sorkar ka la buh maw nongrim ban pynbha biang ïa ka Orchid Hotel, Shillong sha ka ‘5-star Aurika Hotel’ da ka Lemon Tree Group.
Haba pynsngew ba ka Sorkar ka dang pyndonkam ruh ïa ka lariti bad ka sap ka put ka tem jong ka Jylla ban rah shakhmat ïa ka Meghalaya kum ka jaka jngoh kai pyrthei kaba pawnam, u la ong ki tamasa kum ka ‘Cherry Blossom’ bad ‘Me’gong’, ryngkat ka ‘Shillong Literary Festival’ ki la pynlong ïa ka Jylla ka jaka kaba khring ïa ki nongjngoh kai pyrthei.
“Ha u snem 2024, ka Jylla ka la pyllait ïa ka ‘Mobile-first Platform’ – ‘Hello Meghalaya’ – ka jingsdang ïa ka lynnong kaba thymmai na ka bynta ki phlim Khasi, Garo bad Pnar bad ka jingïathuhkhana lyngba ka lad ‘digital’. Shuh shuh haba bynrap ba ka rynsan OTT ka wanrah ïa ka jingpynbyrngia ha kti ki nongshong shnong, ha kawei ka liang kaba pynïajan ïa ka jingïadei hapdeng ki nongshna phlim bad ki nongpeit, u la ong, “Ka ai bor ïa ki nongshna phlim bad ki nongthaw ‘content’ jong ka thaiñ lyngba ki lad kamai da kaba pyndonkam ïa ka jinglah ban shna pynwandur jong ki.”
