Jowai, Lber 02
Ka Raij Jwai lyngba ka Dorbar Niam ha ka jingïalam u Doloi kum khlieh ka niam, ha ka 2 tarik Lber kum shibynta ban pynkhreh-pynkhrum bad pynphuh-pynphieng ïa ka Iung Langdoh shwa ban sdang ka lehniam Behdienkhlam, ki la pyndep ban syrdep phlang ha ka jingïashim bynta ki shakri niam ka Raij ha ka jingsakhi lang ruh da ki ‘riew rangbah ka Seiñraij Jowai.
Shwa ban sdang syrdep phlang ïa ka Iung Langdoh, u Doloi Ma Puramon Kynjing ryngkat u Pator, u Langdoh, ki Sangot, ki Phra kur Phra kmai kiba don bynta ha ki kam jong ka Raij ki la nguh la dem ïa ki blei ki syiem.
Haba ïakren bad u Ma Puramon Kynjing u la ïathuh ba ka jingsyrdep phlang ïa ka Iung Langdoh ka dei ka rukom, dustur ba la hikai naduh ki longshwa namar ha kane ka ïing ïa kiba bun ki kam niam jong ka raij ka shnong la pyndep lyngba kane ka ïing kaba long katkum ki hukum adong u Trai kynrad.
Shuh-shuh, u la ong lyngba ka jingsyrdep phlang ka long ruh shibynta ka jingwanrah ïa kata ka jingsngew ba don kajuh ka jingkitkhlieh hapdeng ki khun ka raij na ka bynta ka bha ka miat ka Iung Langdoh.
Nalorkata, u la ong ruh ka jingwan ïashim bynta kiba bun balang ha ka jingsyrdep phlang ka long ruh kum ka dak ka jingsngewnguh sngewburom ka pateng ïa ka Beipun Doh kaba dei ka nongkha ïa ka pateng ka ban pyndep ïa ki kam niam na ka bynta ban ïoh ka shnong ka raij ïa ki jingkyrkhu kyrdoh bad ka bit ka biang ha baroh ki liang.
U la ïathuh ruh ba ha kane ka Iung Langdoh u doloi u pyndep ïa ka kam bishar khadar na ka bynta ka shongsuk shongsaiñ bad ban bha ban miat ki khun ka raij ka shnong.
