Shillong, Lber 02
Ka Sorkar Jylla ha ka sngi sdang jong ka Dorbar Mang Tyngka ka la wanrah ïa ka Meghalaya Ceiling on Government Guarantee Bill, (MCGG), 2025 bad ka Meghalaya Goods and Service Tax (Amendment) Bill, 2025.
Ïa ka MCGG, 2025, la wanrah da u Myntri Rangbah ka Jylla ba khmih ïa ka tnad pla tyngka, u Conrad K. Sangma.
“Ka jingthmu ba kongsan jong kane ka aiñ ka long ban pynbeit ïa ki jingkular jong ka Sorkar bad kiwei-kiwei ki mat kiba ïadei bad kane. Haba shna ïa kane ka aiñ, la dep ban khmih ruh ïa ka Guarantee Policy ka Sorkar Pdeng, The Kerala Ceiling on Government Guarantee Act, 2003 bad ka Mizoram Ceiling on Government Guarantee Act, 2011,” la bynrap shuh-shuh.
Ha kawei ka liang, u Myntri ka tnad khajna, Abu Taher Mondal u la wanrah ïa ka Meghalaya Goods and Service Tax (Amendment) Bill, 2025.
Ka ‘statement of objections and reasons’, ka ong ba ka Sorkar Pdeng kaba treikam katkum ka jingai jingmut jong ka Goods and Services Tax Council, ka la wanrah jingpynkylla ha ka Central Goods and Services Tax Act, 2017 vide the Finance (No.2) Act. 2024, baroh ki Jylla bad ki Union Territory (lem bad ka ‘legislature’) ki dei ban wanrah jingpynkylla ïa la ka jong ka jong ka ‘Goods and Services Tax Act’ khnang ban lah pyntreikam, ha kajuh ka por ïa ki kyndon ba la wanrah jingpynkylla, kumta ka Meghalaya Goods and Services Tax Act, 2017 (Act No.10 of 2017) ka donkam ban wanrah jingpynkylla ha ka katkum ki jingai jingmut jong ka GST Council.
Shuh shuh la wanrah ïa ka ‘Annual Report’ jong ka Shillong Smart City Limited (SSCL), Meghalaya State Electricity Regulatory Commission na bynta u snem 2023-24, Meghalaya State Pollution Control Board 2021-22 bad 2022-23.
