Shillong, Lber 03
U Myntri ka tnat Pule-Puthi ha ka Jylla, Rakkam A Sangma u la pyntip ba ka Sorkar Jylla ka dang ap ïa ka jingpyllait pisa na ka Sorkar Pdeng ban ïoh pyllait pat ïa ka pisa baibam ba dang sahteng jong ki samla pule ka Jylla.
Haba kren bad ki lad pathai khubor ha ka Lah Sngi U Blei, u Rakkam u la ong ba ka Sorkar Jylla ka dang ap ïa ka bynta balai (third instalment) jong ka pisa na ka Sorkar India.
Katkum ka jingïathuh u Myntri, ka Sorkar Pdeng ka la dep pyllait haduh ka bynta ba ar (second instalment) ïa kaba la dep pyllait sha kumba 40,000 ngut ki samla pule, katba ka bynta balai la khmih lynti ba yn sa ïoh noh shen na ka bynta ban pyllait pat sa sha kumba 20,000 ngut ki samla pule ki bym pat ïoh ïa ka baibam.
“Kumba 60,000 ngut ki samla pule kiba dei hok ban ïoh ïa ka baibam bad kumba 40,000 eiei kiba la dep ban ïoh bad sa kumba 20,000 ngut ba sang sah ban pyllait lada ngam bakla, ngan sa pan jingtip ba bniah na ki ophisar jong nga”, la ong u Myntri. Lah ban kdew hangne ba ka Directorate of Higher & Technical Education jong ka tnat ka Pule-Puthi ka Jylla ha u Naiwieng 2024 ka la pyntip ba ka la dep pyllait ïa ka Post Matric Scholarship 2023-24 sha 49,628 ngut ki samla pule ka Jylla Meghalaya ha ki ar bynta bad mynta ka dang ap ban ïoh ïa ka pisa na ka Sorkar Pdeng kaba dei ka bynta balai, ban pyllait ïa ka baibam kaba dang sahteng sha 27,127 ngut ki samla pule. Ha ka bynta banyngkong, la ïohpdiang ïa ka pisa kaba long T.42,32,13,280 kaba kynthup ïa ka bhah na ka Sorkar Pdeng kaba long T.38,08,91,952 bad ka bhah na ka Sorkar Jylla kaba long T. 4,23,21,328 bad la dep pyllait sha 17,364 ngut ki samla pule.
Ha ka bynta kaba ar, la ïohpdiang ïa ka pisa kaba T.66,66,66,667 kaba kynthup ïa ka bhah na ka Sorkar Pdeng kaba long T.60,00,00,000 bad ka bhah na ka Sorkar Jylla kaba long T. 6,66,66,667 bad ïa kane la dep ban pyllait sha 32,064 ngut ki samla kiba dei ban ïoh jingmyntoi.
Ka pisa kaba dang sahteng ka long na ka bynta ki 27,127 ngut ki nongïoh jingmyntoi, ïa kaba la khmih lynti ban sa ïoh noh shen na ka Ministry of Tribal Affairs jong ka Sorkar India, hadien ba ka tnat ka la shim khia bad ka Sorkar India na ka bynta ban pyllait noh ïa ka pisa kaba dei ka bynta kaba lai ban pynthikna ba baroh ki samla pule kiba dei hok ban ïoh ïa ka baibam kin ïoh ha ka por kaba biang.
