Nongstoiñ, Lber 03
Ki ‘riew rangbah, ki longkmie kumjuh ki samla na ki shnong bapher bapher ka dong bad ka thaiñ Maweit ha ka 3 tarik Lber 2025, ki la lum ïa ka jingïalang hapoh ka ïingdorbar jong ka ïew Maweit halor ka jingeh kaba ki nongrep ka thaiñ Maweit ki ïakynduh khamtam ka jinghiar dor jong u synsar.
Ha katei ka sngi ïa ka jingïalang la pynïaid da u Secretary ka shnong Maweit Bah Orius Thongni.
Shuh shuh la ïoh ka jingkren bad pynshai na u Bah Tonington Tyrsa uba long u Convener na ka bynta kane ka jingïalang halor ka jingeh jong ki nongrep khamtam ka jinghiar dor u synsar. Ha kane ka jingïalang la ïatai ïathir lyngba ki ‘riew rangbah na ka thaiñ, bad hadien ka jingïatai da kawei ka jingmut la rai ban thaw da ka kynhun lane ka seng jong ki nongrep ka thaiñ Maweit, ïa kaba la ai kyrteng ka Farmer Association Maweit Area (FAMA).
Ha kane jingïalang la jied ïa u Bah Protastius Puwein kum President ka Association, samla Khrawkupar Byrsat kum u Secretary, Vice President Kaspar Nongsiang, Asst Secretary Kong Wandashisha Ryntong, Finance Secretary Kong Lucy Byrsat, ryngkat ki 8 ngut ki dkhot ka executive committee bad la jied ïa u Bah Tonington Tyrsa kum u nongai jingmut kane ka association.
