Shillong, Lber 03
U Symbud Myntri Rangbah ka Jylla, Bah Prestone Tynsong ha ka Lah Sngi U Blei u la ong ba ka Sorkar ka la mang 7 tylli ki Border Out Post (BOP) kum shi bynta ban peitngor ïa ka jinglong-jingman ha ki jaka khappud jong ka Jylla.
“Ki la don bun tylli ki sienjam kiba la shim ban pynbeit ïa ka kajia pud da kaba kynthup lang ïa baroh 2 tylli ki Sorkar Jylla bad ki nongïalam ha ka imlang-sahlang,” ong u Bah Tynsong haba jubab ïa ka ‘Call Attention Notice’ ba la wanrah da u MLA ka Mowkaïaw, Bah Nujorki Sungoh ha ka sngi ba-ar jong ka Dorbar Mang Tyngka.
U la ong ruh ba ka Sorkar ka la mang 7 tylli ki BOP – Rani Jirang BOP ha Ri-Bhoi, Lang-pih BOP, Lejadubi BOP bad Umwali BOP ha West Khasi Hills, Moorïap BOP ha East Jaiñtia Hills, Tihwich BOP bad Mukroh BOP ha West Jaiñtia Hills, ban pynbeit bad peitngor ïa ki kam ba ïadei bad kajia pud.
“Ka Sorkar ka la mang ruh 9 tylli ki ‘Police Out-Post’ bathymmai hapoh ka Jylla – Mawkynrew OP bad Mawjrong OP ha East Khasi Hills, Kyrshai OP, Athiabari OP bad Malangkona OP ha West Khasi Hills, Barato OP ha West Jaiñtia Hills, Umpleng OP ha East Jaiñtia Hills, Rongsak OP bad Bawegre OP ha East Garo Hills,” ong u Bah Tynsong.
Ha kajuh ka por, u la ong ba ka Sorkar ka kular skhem ban ïada ïa ki hok bad ka jingshngaiñ jong ki nongshong shnong ha khappud bad kan ïai bteng ban shim ïa ki sienjam ba donkam ban weng ïa ki jingeh jong ki paidbah.
Shuwa kane, halor ka ‘Call Attention’ ba ïadei bad ka khubor ban ‘Boycott’ (ka Mukroh) ïa ka ilekshon JHADC, u Symbud Myntri Rangbah u la ong ba ha ka 10 tarik Kyllalyngkot mynta u snem, u Rangbah Shnong bad Secretary ka shnong Mukroh ki la phah jingthoh sha u Deputy Commissioner, West Jaiñtia Hills District, ban pynsngew ïa kane ka bynta.
Hadien kane, ha ka jingïalang kaba la lum kyrkieh da u Deputy Commissioner, West Jaiñtia Hills bad ki nongmihkhmat na ka imlang-shalang ha ka 17 tarik Rymphang mynta u snem ha Mukroh, la kular ba ki bor distrik bad pulit kin ïaleh katba lah ban ïada bad ban wanrah ïa ka shong suk shong shngaiñ jong ki nongshong shnong ha khappud.
U la ban biang ba ki bor distrik ka West Jaiñtia Hills ba kynthup ïa ka tnad pulit ki trei minot khlem shongthait ban pyntikna ïa ka suk ka saiñ hapoh ka thaiñ.
U Symbud Myntri u la ong ruh ba ka jingtuklar biang por ha kiba bun na ki jingïakynad ka la ïarap ban khanglad ïa ka jingnang heh shuh-shuh jong ka jinglong-jingman.
“Namar kine ki jingtrei shitom, ki nongshong shnong Mukroh ki la pyrkhat biang halor ka rai ba la shim bad kohnguh ban ïashim bynta ha ka ilekshon. Ka jingïalap ilekshon ka la ïaid beit ïaid ryntih bad la peitngor ïa ka jinglong-jingman ban pyntikna ïa ka shong suk shong shngaiñ hapoh ka thaiñ,” u la ong. Shuh shuh u la bynrap ba ha ka ilekshon ba la dep sha ka JHADC, ka jingdon jong ki nongwan thep ‘vote’ na 12-Barato Mukroh konstitwensi ka long 84.63%.
“Kane ka jingkheiñ ka pyni shai ïa ki sienjam kiba la shim ban pyntikna ba ki paidbah kiba shong ba sah ha ki jaka khappud hapdeng ki ar Jylla ki pyndep ïa ka hok ban thep ‘vote’,” u la ong.
