Shillong, Lber 03
U Bah Ardent M Basaiawmoit uba dei u MLA ka VPP na Nongkrem kaba don ha ka Liang Pyrshah ha ïingdorbar thawaiñ ka jylla, u la pynpaw ka jingpyrshah jur halor ka jingkren u Lat ne ka ‘Governor Address’ ba ka ilekshon sha ar tylli ki Autonomous District Council ka long kaba ïaid beit ïaid ryntih bad kaba khuid.
U Bah Ardent u la pynpaw ïa kane haba ïashim bynta ha ka jingïatai halor ka ‘Governor Address’ ha ka Lah Sngi U Blei ka 3 tarik Lber 2025 hapoh ka ïingdorbar thawaiñ ka jylla.
Haba kdew ïa ka bynta jong ka jingkren halor ka jingpynpaw ba ki bor pynïaid district bad ka tnat pulit ki la lah ban pynïaid beit ïaid ryntih ha ka rukom kaba khuid ïa ka ilekshon sha KHADC bad JHADC, u Bah Ardent u la ong, “Nga pyrshah jur ïa kane, ba ka long kaba ïaid beit ïaid ryntih, tang ha KHADC ka ilekshon ka ïaid beit ym ha JHADC.”
“Nga la dep ban kren bad ngan dang ïai bteng, ba lada dei ba ka ilekshon ka ïaid beit ïaid ryntih bad long khuid, ka VPP ka la dei ban ïoh lam khmat ïa ka EC ha JHADC,” la ong u Bah Ardent bad bynrap “Kum ka seng la pyntip ïa ngi ïa ka rukom long ka ilekshon ha JHADC bad ki nongïalam shnong kin rai ïano ban jied bad pynbor ïa ki nongshong shnong ba kin jied bad ym ban ailad ha ka hok bad laitluid jong ki nongshong shnong ban jied.”
U Bah Ardent u la ong, “Ngi la dep ban kdew ïa ki polling station kiba don jingma, hynrei kane kam shym la poi shaei shaei bad na ka liang jong u RO ruh um shym la shimkhia halor kane. Don bun ki Polling Station ba don ka jingleh donbor. Kumno ngin ong ba ka long kaba khuid haba peit lei ha ki katto katne ki polling station, kum ha Moolamanoh A Polling Station na ka 609 vote kaba don, 593 vote ka leit sha u kyrtong ba la rai da ki Nongïalam shnong, ha Moolamanoh B na ki 604 vote haduh 589 ka leit sha u kyrtong ba la rai da ki Nongïalam shnong. Kumjuh ruh ha Wapungskur A na ki 782 vote, 656 vote ka la leit tang sha u kyrtong ba la rai da ki Nongïalam shnong. Kumjuh haba phai sha Khliehriat East na ki 780 vote haduh 778 vote ka la leit tang sha uwei bad kumta ter ter.”
Shuh shuh, u Bah Ardent u la ong ruh “Uwei na ki polling agent jong ngi u la shah rahbor katto-katne kynta ha Nartiang. Sa uwei ha Shilliang Myntan la rah da kiba ïakhun pyrshah bad mut ban bret nalor jingkieng. Te kumno yn ong ba ka long ka ilekshon kaba khuid. Nga don ka kopi FIR bad bun tylli ki ejahar ngi la ujor.”
U Bah Ardent uba la pule ruh ïa kawei na ki ejahar ba la ujor hapoh ka ïingdorbar, u la ong kum ka seng kan nym shong kli kti, tad haduh ba ki paidbah kin ïoh lad hok ban pyndep laitluid ha kaba jied ïa ki nongmihkhmat ha Jaiñtia Hills. Katba, na ka liang u MLA ka NPP na Jowai u Bah Wailadmiki Shylla haba shim bynta ha katei ka jingïatai halor ka jingkren u Lat hapoh ka ïingdorbar, haba kynthoh halor ka jingkynnoh u Bah Ardent, u la ong ba ka long kaba sngewsih ban ïohsngew ïa ka jingkynnoh jong u MLA VPP, namar ha ka thaiñ ba ki jop ka dei ka ilekshon kaba laitluid bad ba khuid, katba ha ka thaiñ ba ki rem ka ilekshon kam dei kaba laitluid bad ba khuid.
“Kum u Nongmihkhmat u MLA na ka thaiñ Jaiñtia, Nga sngewsih ban ïohsngew ïa ka jingkynnoh ba ngim don ka ilekshon kaba laitluid bad ba khuid ha Jaiñtia Hills. Ka long kaba sngewsih ban ïohsngew na u Nongïalam ba la rangbah, ba ha ka jaka ba ki jop ka dei ka ilekshon kaba laitluid bad kaba khuid, katba ha ka jaka ba ki rem ka ilekshon kam dei kaba laitluid kaba khuid”, la ong u MLA ka NPP.
U Bah Wailadmiki u la ong ba ki paidbah na Jaiñtia ki la dep ai ïa ka rai jong ki dang ha kine ki sngi ba la dep, bad na ka bynta kane ki bor pynïaid district, ki pulit bad ka tnat pynïaid ilekshon ki la trei shitom bha ban pynlong ïa ka ilekshon kaba laitluid ba ïaid beit, hynrei ka long kaba sngewsih pat ban ïohsngew ïa ka jingshah kynnoh.
