Shillong, Lber 03
Ka kynhun jong ki nongtrei bylla sngi kiba trei hapoh ka Main Secretariat, Shillong kiba la shah pynsangeh noh na ka kam, ha ka janmiet jong ka 3 tarik u Lber ki la rai ban pynkut noh ïa ka jingïakhih kaba la sdang naduh ka 28 tarik u Rymphang ha madan Malki, Shillong kaba la kynjoh sha ka saw sngi lynter.
Kine nongtrei bylla sngi kiba don 30 ngut kiba kynthup naduh ki cleaner, sweepers, mali bad chowkidar ki la shim ïa kane ka rai ban pynkut shwa ïa kane ka jingïakhih ka dei namar ka jingdon jong ka dorbar mang tyngka jong ka jylla.
Ha ka jingïakren bad ki nongthoh khubor, na ka liang u Bah I Blah u la ong, “kum ka kynhun ngi la shim ïa kane ka rai ban pynsangeh shwa shipor ïa kane ka jingïakhih ka jong ngi namar ba dang don kane ka dorbar mang tyngka bad hadien ba la kut ka dorbar mang tyngka ngin sa pynlong pat ïa kane ka jingïakhih kata ha ka 17 tarik u Lber 2025.”
U la ong ruh ba na ka liang ka kynhun ka pynpaw ïa ka jingai khublei ïa baroh ki sengbhalang kiba la wan ban ai jingkyrshan khamtam ïa ka HNYM, ka Khasi Jaiñtia Labour Union bad ruh ïa ka seng KHNAM kiba la wan ban ai jingkyrshan naduh ba sdang jong kane ka jingïakhih ba jai-jai jong ngi. Nangta u la ai khublei kyrpang ruh ïa ka shnong Malki kaba la ai ïa kane ka jaka ban ngin ïoh ban pynlong ïa kane ka jingïakhih.U la ong ruh ba ngin sa wan ban shong biang ha kane ka jaka naduh ka 17 tarik u Lber bad tad haduh ba ngin da ïoh ïa ka rai kaba biang.
“Ngi la don ka jingthmu ban ïoh ïakynduh bad ki Myntri Sorkar ne bad ki Officer sorkar hynrei namar ka jingdon jong ka dorbar mang tyngka ngin ym ïoh ka lad ban kynduh,” u la ong.
Kum ban shu pynkynmaw na ka liang kane ka kynhun ka la sdang ban pynlong ïa kane ka jingïakhih ba jai-jai naduh ka 28 tarik u Rymphang 2025 hadien ka jingshah pynsangeh na ka kam kaba ki la trei la kumba 15 snem tam.
Dang ha kine ki khyndiat sngi kane ka kynhun ka la pynpaw ruh ba ki la shah leh shiliang ha u Nazir uba peit bad khmih ïa ki kaba la pynlong ïa ki ban mih shakhmat ban pynlong ïa kane ka jingïakhih.
