Shillong, Lber 03
U Lamphang ka Ïingdorbar Thaw Aiñ jong ka Jylla, Thomas A Sangma, u la ong ba ka ophis jong u ka la buddien bad pyrshang katba lah ban pynstet ka jingtei ïa ka Ïingdorbar Thaw Aiñ bathymmai, ha kaba u la pynthikna ba ha ka sien shong dorbar ka ban sa wan yn sa pynlong noh hapoh ka Ïingdorbar bathymmai.
“Ka jingtrei ka la ïaid stet bha mynta. Katba nga dang kren mynta ruh ka jingtrei ka la ïaid ban pynbit pynbiang ïa ka ‘main hall’. Ngi pyrshang ban leh kaba bha tam, khlem ka jingartatien ka sien shong dorbar ka ban wan kan long hapoh ka Ïingdorbar Thaw Aiñ bathymmai”, la ong u Lamphang. Haba kylli, na ka liang u Lamphang u la ïathuh ba ïa ka tnum pyllun ‘dome’ ruh lah dep ban pyndait bad kaba sah mynta ka long sa tang ban tap ïa ka bynta ba halor jong ka tnum.
Haba pynpaw ka jingsngewkhia halor ka jingslem ban tei ïa ka Ïingdorbar bathymmai, u Thomas u la pynshai ba ka jingslem jong ka kam kam dei satia na ka daw ba duna ki nongbylla, hynrei ka dei namar ka jingkyntiew ïa ka tnum pyllun kaba dang ïaid mynta ruh.
“Ka jingpynïeng ïa ka bynta ba ha khlieh duh ka la dep, bad mynta ka kam ka dang ïaid bad ka kham slem ha ka ban pynbit pynbiang ruh ïa ki bynta ba shapoh kamra, hynrei mynta nga ngeit ba ïa kine kiei-kiei ruh la lah ban pynbit pynbiang”, u la ong.
Ha kaba ïadei bad ka jingtynrong ïa ka tnum pyllun, u Lamphang u la ong ba ka jingohshrong ba khatduh ba tap ïa ka tnum pyllun kaba ju khot da ka ‘pansngiat’ ka dang donkam ban hap ban tynrong ha ka jaka ba la thmu ban buh.
