Jowai, Lber 03
Ka ïingkashari District and Sessions Court, Jowai, ka la rai pynrem ïa u Shwamiki Law da kaba set patok shi jingim halor ka jingpynïap ïa la ka kurim ka Daphibanker Phawa ha ka 11/.10.2018.
Ïa ka mukotduma la register ha thanat Jowai, Case Number 231 (10)18 U/S 307/ 302 IPC bad la tohkit bad pynngat Charge Sheet da ka WPSI I Kharpran.
Hadien ba la pyndep ïa ka jingshim bishar, la pynrem ïa u Shwamiki Law da ka jingshah set patok shi jingim bad ka kuna T.5000 (San hajar tyngka).
Shuh shuh, ka ïingkashari ka la bthah ruh ban siew bai lutksan kaba T.6,00,000 (Hynriew Lak) na ka bynta 3 (lai) ngut ki khun jong ka kmie kaba la khlad noh.
Kum ban pynkynmaw ha ka 11/10/2018 u kpa jong u Shwamiki Law u la ujor da ka ejahar ha thanat Jowai, ba ha ka por kumba 11:50 mynmiet eiei u khun jong u (Shwamiki Law), uba sah ha ka mala kaba nyngkong jong ka ïing ryngkat bad ka kurim bad lai ngut ki khun, u la rung shapoh kamra thiah jong u, da ka jingmynsaw ha ka ryndang, um lait ban kren, bad u la pyni da ki kti ba don kaei-kaei kaba bakla ha ka jaka sah jong u. Mar mar u kpa u la mareh sha ïing jong u Shwamiki Law, bad u la lap ba la pynïap beiñ ïa la ka pyrsa da kaba la ot na ryndang da ki briew ki bym tip satia.
