Shillong, Lber 03
U MDC ka Laban-Mawprem konstitwensi, Bah Ricky Shullai ha ka Lah Sngi U Blei u la leit ïakynduh ïa u Executive Engineer (EE) ka tnat PWD (Roads) Shillong Central Division, Bah S Lytep ban kyntu na ka bynta ban shim khia noh mardor ban shna ïa ka surok ha Lawsohtun kaba la sniew bad dap sa tang ki thliew ki syar.
U Bah Ricky Shullai tang hadien katto-katne sngi ba u la dep bam smai kum u MDC ba pura jong ka Khasi Hills Autonomous District Council (KHADC) u la shimkhia mardor ïa ka jingeh ba la mad da ki paidbah ha konstitwensi namar ka jingsniew palat jong ka surok ha Lawsohtun. Ha kane ka jingïakynduh na ka liang u Bah S Lytep u la kubur ba katei ka surok ka la sniew bha.
U Bah Ricky u la ïathuh ba u la kyntu ïa u Bah Lytep ban sdang noh ban pyndap ïa ki thliew surok kiba la sniew khamtam haba ka aïom lyiur ruh ka la jan kaba lah ban wanrah jingeh ïa ki paidbah ha ki por ba slap jur.
“Nga dap da ka jingsngewtynnat ba u EE bad ka Sorkar Jylla ki la shim khia bad ki la shim ïa ka rai ban bhah ïa ka pisa na ka bynta ban shna pynbha bad shna thymmai noh ïa ka surok kaba la sniew bad la khmih lynti ba ha kane ka mang tyngka jong une u snem yn sa pyllait noh ïa ka pisa ban sdang shna noh ïa katei ka surok”, la ong u Bah Ricky.
U MDC u la ong ba wat la katei ka khubor kaba u la ïoh ka long kaba sngewtynnat, hynrei un ïai buddien pat ïa kane ka kam khnang ba kan long ka jingmyntoi ïa ki paidbah kiba pyndonkam ïa katei ka surok.
U la ong ruh, ba kum u MDC un sa leit ïakynduh ïa ki nongïalam shnong khamtam haba bun ki paidbah mynta ki la sdang ban sait kali ha surok kaba don ha ka thaiñ ‘Farm’ bad lada kane ka ïai bteng ka surok kan sa sniew lut bad kan buh ïa ki paidbah ha ka jingeh ha ka leit ka wan ka jong ki.
