Shillong, Lber 03
U MLA ka Rongara Siju uba dei Myntri hapoh ka Sorkar MDA-II, Rakkam A Sangma u la pyntip ba 4 ngut ki MLA na South Garo Hills kin leit ïakynduh ïa u Myntri Rangbah ka Jylla, Conrad K Sangma na ka bynta ban pan ïa ka lynti rel na Mendipathar, North Garo Hills shaduh Baghmara hapoh South Garo Hills.
Haba kren bad ki lad pathai khubor ha ka Lah Sngi U Blei, u Rakkam u la ong ba ma u ryngkat ki MLA na kajuh ka district kin sa leit aiti da ka dorkhas ha u Myntri Rangbah ka Jylla ban kyrpad wanrah ïa ka lynti rel.
U la ong ba un sa kyrpad ïa u Myntri Rangbah ban ïakren bad ka Sorkar India ban pynïaid lynti rel na Mendipathar sha Baghmara shaduh Dhaka, Bangladesh khnang ban kyntiew ïa ka ïoh ka kot jong ka Jylla.
“Nga ryngkat 4 ngut ki MLA na ka district ngin sa leit ïakynduh ïa u Myntri Rangbah ban aiti ïa ka dorkhas na ka bynta ban pynpoi ïa ka lynti rel na Guwahati sha Mendipathar, Baghmara bad wat sha Dhaka”, la ong u Rakkam.
U la ong ba kane ka jingpan lynti rel ka long ban pynkhlaiñ ïa ka khaïi-pateng bad kiwei ki jaidbynriew ha ki por ban wan, ha kaba u la ong ruh ba ha shwa ba ka ri India kan ïoh laitluid ka la ju don ka jingkhaïi pateng kaba jur bha bad ki nongshong shnong ha Dhaka.
“Lada lah ban wanrah ïa ka lynti rel mynta kan kyntiew shuh-shuh ïa ka kamai-kajih bad kan pynsuk ha ka leit ka wan jong ki paidbah. Kane ka dei ka lynti ïaid hadien habud namar shwa ba ka ri India kan ïoh laitluid, ka don ka khaïi-pateng kaba jur bha na ka thaiñ”, u la ong.
Haba pynpaw ba ka ri America ka riewspah namar ba ka don ki lynti-syngkieñ kiba bha, u la ong ba ha kane ka Jylla ruh ka dei ban long kumjuh, bad bynrap ba ka lad pynïasoh ka long kaba donkam bad kaba kongsan na ka bynta ka roi ka kiew ha ka ïoh ka kot jong ka thaiñ.
“Ngin sa kyrpad ïa u Myntri Rangbah ban ïakren lem bad ka Ministry jong ka Sorkar India ba kan pynpoi lynti rel sha Baghmara bad shaduh Dhaka”, la ong u Rakkam.
Ha kajuh ka por u Myntri ba khmih ïa ka tnat Pynroi Khappud (Border Area Development), u la ong ba ka long kaba kongsan ruh ban don ka khyrdop (Integrated Check Post) ban peitngor bad talasi ïa ki briew kiba rung ba mih khnang ban teh lakam ïa ka jingïoh rung beaiñ ki briew na bar.
