Shillong, Lber 04
U Chief Executive Member (CEM) ka Khasi Hills Autonomous District Council, Bah Shemborlang Rynjah uba dei u MDC na Lyngkyrdem-Laitkroh u la ïoh ban bate ïa ki tnat treikam bapher bapher sha hynñiew ngut ki Executive Member kiba dang shu shah jied na bynta ban pynïaid ïa ki kam jong ka Executive Committee bathymmai ba la ïalam da ka VPP.
Katkum ki khubor ba la ïoh lum, u CEM u la peit hi ïa ka tnat Elaka kaba peit ïa ki Syiem bad Sirdar, nangta u la bat hi ïa ka General Administration Department, Posting & Transfer, Establishment, Appointment, Market, Forest bad kiwei ki tnad lada ym don ba bat na ki EM. Ïa kane ka bhah kam la sam hadien ba u Lat ka Jylla u la ai ka jingmynjur ïa ki 7 ngut Executive Member (EM) jong ka KHADC.
Katkum ka jingsam bhah, u MDC ka Mawthadraishan Bah Powell Sohkhlet u la ïoh ïa ka tnat IT bad Land & Development, u MDC ka Nongthymmai Bah Winston Tony Lyngdoh u la ïoh ïa ka tnat Labour, Trade, Enforcement bad Revenue, ka MDC ka Laitumkhrah-Malki Kong Deiti Majaw ka la ïoh ïa ka tnat Law & Legal Matters, Marriage & Divorce, Town Committee, ka MDC Mylliem Kong Aibandaplin L Nonglait ka la ïoh ïa ka tnat Health & Sanitation, Education, u MDC ka Mawkyrwat Bah Pynkhraw Kharjahrin u la ïoh ïa ka tnat Council Building bad Council Assets, Building Byelaws, u MDC ka Umroi Bah Isynei Hinge u la ïoh ïa ka tnat Water Resources, Fisheries bad u MDC ka Mawkynrew Bah Seiborlang Warbah u la ïoh ïa ka tnat Finance.
