Shillong, Lber 04
U MLA ka AITC na Songsak uba dei u Nongïalam ka Liang Pyrshah ha ka Jylla, Dr. Mukul Sangma, u la ïathuh ba ha ki por ba la dep ka la don ka jingpyrshah kaba jur na ki paidbah ha Garo Hills ban wanrah ïa ka lynti rel ha Mendipathar, North Garo Hills.
Haba kren halor ka jingpyrshah jong ki nongshong shnong ha Khasi-Jaiñtia Hills ïa ka lynti rel, kaba la pynlong ïa ka Sorkar ban hap pynphai noh ïa ka pisa bai jaka kaba palat T.200 klur, u Dr. Mukul uba dei ruh u Myntri Rangbah barim u la ong ba ka long kaba donkam ban don ki lad pynïasoh ha ka leit ka wan bad na ka bynta ka kit ka bah.
“Nga kynmaw ba ka don ka jingpyrshah kaba jur bha ha ka por ba la tyrwa ban wanrah ïa ka lynti rel ha Depa, Mendipathar, ka dei ha ki snem 1996-97 ba la thmu ban sdang ïa ka jingtrei hynrei namar jingpyrshah kaba jur kane ka khlem long kam. Ha u snem 2009-10 hadien ngi la wanphai ha ka Sorkar, ngi la pynsngewthuh ïa ki paidbah da kaba thaw ruh ïa ki komiti ban pdiang ïa ka lynti rel”, la ong u Dr. Mukul haba kren ha ka Sngi Ba-ar.
U la ong ba ka daw ba la mih ka jingpyrshah na ki paidbah ka dei na ki jaka ba pynïaid ïa ka lynti rel, bad ha katei ka por la pynkylla noh ïa ka rukom pynïaid ïa ka lynti rel, ha ka jaka ban pynïaid sha Depa la wanrah noh sha Mendipathar. U la ong ba hadien kane ka kam ka la ïaid bad la lah ban pyndep ïa ka jingtrei haduh ban da lah syndon ban plie ïa ka.
U Dr. Mukul u la ong ba mynta ki nongrep ki la pyndonkam beit da ka rel ban die ïa ki mar rep jong ki na Mendipathar sha Guwahati ha ka dor kaba biang, bad ka bai leit bai wan ha kato ka por ka long tang T.60 bad leit bad wan.
“Kane ka long ka jingpynïasoh ba la lah ban pynïoh, kaba ngi kheiñ ba ka dei kaba tad dor na ka bynta ki nongrep kiba duk. Kaei kaba nga kwah ban ong ka long ba ki paidbah ki la ïoh jingmyntoi na kata, ki don ki jingsngewkhia ngi la pyrshang ban pynbeit”, la ong u Dr. Mukul.
Ha kaba ïadei bad kane ka thaiñ Khasi-Jaiñtia, u Myntri Rangbah barim u la ong ba ka la don ka jingpyrshah ïa ka lynti rel naduh kaba sdang bad ka jingpyrshah ka long namar ka jingsngewkhia jong ki paidbah, ba ka lynti rel kan dei ka daw jong ka jingïoh rung beaiñ kiba na bar bad ka jingshah tyllep ha kiwei pat ki jaidbynriew.
“Kane ka jingsngewkhia ka long katkum ba ngi la ïohi ha kiwei ki Jylla kane ka thaiñ North East. Ka Tripura ka dei kawei ka nuksa, kumta kine ki jingsngew ki dei kiba khia bad dei ban pynbeit ha kata ka rukom ba ym dei tang da ka ktien, ban don ki lad jingïada”, u la ong.
U Dr. Mukul u la ong, haba ïakren ha ka liang ka jingpynïasoh ha ka leit ka wan ki don bun jait ki lad pynïasoh kiba la ïarap bha ruh ha ka por ba wan lynshop ka khlam.
