Shillong, Lber 04
Ki MDC kiba don ha ka liang pyrshah hapoh ka Khasi Hills Autonomous District Council (KHADC) kiba kynthup ïa 5 ngut na ka United Democratic Party (UDP), 4 ngut na ka National People Party (NPP), uwei na ka Hills State People’s Democratic Party (HSPDP) bad 2 ngut ki MDC shimet, ha ka Sngi Ba-ar ki la phah da ka jingthoh sha u Shongknor ka KHADC, Bah Strongpillar Kharjana ba ki la jied ïa u Bah Titosstarwell Chyne MDC ka UDP na Sohra kum Nongïalam ka liang pyrshah.
Ha ka jingïakren bad ki nongthoh khubor, u Bah Titosstarwell u la ong ba hadien ka jingpynsngew na baroh 12 ngut ki MDC ban don ka jingïakynduh lang na ka liang ka UDP ka la pdiang ïa kane.
“Ngi sngewthuh haba ngi shong ha ka liang pyrshah kaba kongsan ka long ba ngin don ka jingïatylli, ban shu ïaïaid la ka jong ka jong ka paw biej hakhmat u paidbah,” u la ong.
U Bah Titosstarwell u la ong ruh ba kaba sngewtynnad ka long ba hadien ka jingïakynduh lang jong baroh ki MDC kiba don ha ka liang pyrshah kata 5 ngut na ka UDP, 4 ngut na ka NPP, 1 na ka HSPDP bad 2 ngut ki MDC shimet ki la pynpaw ba ki dei ban don ïa la ka jong ka kynhun kaba ngim don kano-kano ka jingïadei bad ki seng saiñ pyrthei namar ba ka dei ka kynhun jong ki para MDC.
U la ong ruh ba kane ka kynhun kam don kano-kano ka jingteh jingkhum na ka liang ki seng saiñ pyrthei bad ki kam seng ngin buh la ka jong, hynrei kane kan dei beit ka kam kum ki MDC ba ngi wan hangne hapoh District Council ba la shah jied da u paidbah. “Ngi la ïa don ïa ka kynhun kaba ngi la ïa ai kyrteng ïa ka ‘Synrop Liang Ïatei’ bad ha kane ka kynhun ki la ïa mynjur lang da kawei ka jingmut bad ki la jied ïa nga kum u nongïalam jong kane ka kynhun,” u la ong.
U Bah Titosstarwell u la ong ruh ha kaba ïadei bad ka post ‘secretary’ la jied ïa ka Kong Grace Mary Kharpuri kum ka secretary bad ngi la phah ruh da ka jingthoh sha u Chairman jong ka council ha ka ban ai ka jingmynjur ban jied ïa u Bah Titosstarwell kum nongïalam jong ka liang pyrshah ne liang ïatei.
“Ka la don ka jingïakynduh jong ka NPP bad katto-katne ngut ki MDC hynrei hadien pat ka la don ka jingïapynbeit na ka liang jong nga bad i Kong Grace bad ngi la wan lang ha kajuh ka jingmut bad kata ka long ba ngin ïa don lang hajuh bad kim kwah ban don kano-kano ka jingïapait-jingïapra para ma ngi bad ngi la thaw ïa kane ka kynhun,” u la ong.
Katba na ka liang u Shongknor jong ka Council, Bah Strongpillar Kharjana, u la ong ka liang pyrshah mynta ki la wan da kawei ka jingmut ha kaba ki la jied ïa u Bah Titosstarwell Chyne MDC na Sohra kum u nongïalam ha ka liang pyrshah bad na ka liang jong kine 12 ngut ki MDC ki la dep ruh ban ai da ka jingthoh ryngkat ka jingsoi ïa kane ka jingthoh.
U Bah Strong u la ong ruh na ka liang jong ki kim shym la ai kano-kano ka kyrteng ïa kane ka kynhun, hynrei ki la shu pyntip ba ki la jied ïa u Bah Titos kum u nongïalam ka liang pyrshah. U la ong ruh ba ngan ap ïa ka jingpyntip na ki bad ki lah ruh ban ai ha kano-kano ka por.
“Ha kane ka shithi ba ki la phah, kine baroh ki MDC ki la ïasoi ïa kane ka shithi bad na ka liang jong nga, nga la phah sha u secretary jong ka Council ban leh ïa kaba donkam bad hadien ba ka ophis ka la dep ban leh ïa kaba donkam ngin sa ïoh ban pyntip noh sha baroh,” u la ong.
