Shillong, Lber 04
Ka jingkhuid-jingsuba ka dei kawei ka mat kaba kum ki nongmihkhmat, ki Dorbar Shnong, ki paidbah nongshong-shnong ki da thrang dik-dik ban wanrah ïa ka hapoh ka imlang-sahlang. Hynrei, lada phai pat sha kiba bun na ki jaka kiba don ha ki jaka sor, la sakhi ba ïa ki ñiut-ki ñier bad ki jaboh-jabaiñ la pyntuid khlem jingsalia sha ki wah.
Na ka liang U Nongsaiñ Hima ha ka 4 tarik u bnai Lber, 2025, u la ïohi ïa kane ka jingtheh ïa ki ñiut-ki ñiar harud jong ka Wah Umshyrpi kaba la jia hakhmat jong ka ïingdorbar thawaiñ ka Jylla kaba don ha Rilbong, Shillong.
La sakhi ba ha ka kyndong jong ka kynroh kaba don ha ka khyrdop ban rung shapoh ka ïingdorbar thawaiñ, ki la don shibun ki jaboh-jabaiñ kiba la theh ha katei ka jaka khlem da pyrkhat satia ïa ka jingkhuid-jingsuba bad lada wan u slap, kane baroh ka jingjaboh kan tuid beit sha ka Wah Umshyrpi kaba don ha syndah katei ka jaka.
Ka jingkylli kaba mih halor kane ka long ba hato na ka liang ki nongmihkhmat kiba rung-ba mih lyngba kane ka khyrdop ban leit sha Ïingdorbar thawaiñ ha ka ban leit ïashimbynta ha ka Dorbar Mang tyngka kim ïohi ïa ka jingsatah ki jaboh-jabaiñ ha katei ka jaka ne hato kita ki nongpeit-nongkhmih jong ka Meghalaya Legislative Assembly kim ïohi ïa kane ka jingjaboh ne kaei ka sienjam kaba kin leh ïa kito ki briew kiba ju mlien ban theh ñiut ha katei ka jaka.
Wat la na ka liang ki nongmihkhmat ki ju ïakren ban wanrah ïa ki wahum-wahduid kiba khuid-ba suba ne ki sawdong-sawkun ruh kin long kiba khuid hynrei lada sakhi ïa kum kine ki jingjia, mano ban shim ïa ka jingbah khlieh? Hato ka Sorkar kan shu peit kai, kan shu sngap jar ne kan shim ïa ki sienjam kaba tyngeh ban pynshitom ïa kino-kino ki briew kiba leh ïa kane?
