Shillong, Lber 04
U Myntri Rangbah ka Jylla, Conrad K Sangma, ha ka Sngi Ba-ar u la ong ba ka long kaba donkam ban don ïa ka lynti rel haba phai ha ka liang ka ïoh ka kot ban pynkit ïa ki mar ki mata bad ka projek rel ka long shisha kaba donkam bha.
Haba pyntip ïa kane ha ki kynta kylli jingkylli hapoh ka ïingdorbar mang tyngka kaba dang ïaid shakhmat mynta, u Conrad u la ong ba ka Sorkar Pdeng ka la bthah ïa ka Sorkar Jylla ban pynphai noh ïa ka pisa T.200 klur ba la mang ban thied jaka na ka bynta ban pynïaid ïa ka lynti rel ha Meghalaya.
Haba pynpaw ïa ka jingdonkam jong ka rel, u Myntri Rangbah u la ong, “Kum ka Sorkar Jylla, ngi sngew ba ka long kaba donkam ban don ïa ka lynti rel haba khmih ha ka liang ka ïoh ka kot ban pynkit ïa ki mar ki mata naba kan pynsuk bha ïa ka kit ka bah ïa ki mar na Jylla bad na shabar Jylla ruh”.
U la ong ba ka jingdon ïa ka lynti rel kan kyntiew ïa ka ïoh ka kot bad kan pynjem ruh ïa ka dor ki mar ki mata bad kan ïarap shibun bad pynmyntoi ïa ki nongshong shnong.
Shuh shuh haba jubab bynrap halor ki jingkylli bynrap jong u MLA ka VPP na North Shillong u Bah Adelbert Nongrum, u Conrad u la ong, “Ngim pat thied jaka satia namar ka jingpyrshah kaba jur ïa ka projek lynti rel. Ngi la ïohpdiang ïa ka shithi na ka Northeast Frontier Railway (NFR) ha ka 17 tarik Nohprah, 2024, ba bthah ban pynphai noh ïa ka pisa naba ngi khlem lah ban pyndonkam la 7-8 snem.”
“Namar ba ka dei ka kam kaba kynrum-kynram, ka Sorkar kam shym la pynïaid shakhmat ïa ka kam thied jaka. (Namar ka jingpynslem) ka Sorkar India ka la bthah ïa ngi ban pynphai noh ïa ka pisa,” pyntip u Conrad.
U Myntri Rangbah u la ong, “Nga la dep ïakynduh ruh ïa u Myntri ba dei khmih ïa kane ka kam la bunsien bad ha ka jingïakynduh ba khatduh, nga la aiksai ïa u Myntri ba ngim shym la lah ban pynïaid shakhmat ïa ka projek namar ka jingdon jong ka jingpyrshah kaba jur ban siang ïa ki lynti ïaid ki rel.”
U Conrad u la pynkynmaw ruh ba ha ka por jong ka khlam Covid-19, ka Jylla ka la hap ban shaniah tylli beit ha ki lynti ki trok ban pynpoi ïa ki mar, lada dei ba don ka rel, la lah ban pynsuk shibun.
