Nongpoh, Lber 04
Kumba lai ngut ki briew kiba shong ha kawei ka kali kamai kaba don ïa u registration number ML05-L-1483, ki la ngat ha ka jingmynsaw hadien ba kali kaba ki shong, ka la ïatynrah bad kawei ka Tata Sumo kaba don ïa u registration number ML06-A-8396 ha surok Umroi Bypass kaba dang hap ha ka shnong Nongrah.
Kumba la ïoh jingtip, la ïathuh ba katei ka la jia ha ka por kumba 4:30 eiei katba katei ka kali kamai ka dang leit sha ki bynta jong ka Umïam katba katei ka Sumo pat ka dei kaba dang thmu ban leit sha Bhoirymbong.
La ïathuh ba ka daw jong katei ka jingjia tyngkhuh kali ka dei namar ba u nongñiah jong katei ka kali kamai u la shoh khawiang kat haduh ba um lah shuh ban teh lakam ïa ka kali bad leit ban tynrah beit beit ïa katei ka sumo. Ha kane ka jingjia, kane ka kali kamai ka la julor bun na ki bynta shakhmat bad katei ka Sumo ruh la jot malu-mala na ki bynta shakhmat.
Ïa kitei lai ngut ki briew kiba shong ha katei ka taksi kamai kiba la mynsaw, la pynkit noh sha Bhoirymbong CHC na ka bynta ban pynïoh ïa ka jingsumar bad na ka liang ki bor pulit ruh ki dang pynlong ïa ka jingtohkit halor kane ka jingjia.
