Shillong, Lber 04
Namar ka jingshah beh, ka jingshah khnap bad ka jingbym ailad jong ki pulit pynïaid kali ban pynïeng ïa ki kali kamai Tourist ha ki jaka kiba don ha ki thaiñ Khyndailad ha ka por 8:30 haduh 9 baje mynstep ka la ktah shikatdei eh ïa ki paradoh-parasnam kiba ju pynïeng kali ha kitei ki bynta.
Kumta halor kane, na ka liang ka All Khasi Meghalaya Tourist Taxi Association (AKMTTA), ha ka 4 tarik u Rymphang, 2025 ka la leit ban ïakynduh ïa u Superintendent of Police (SP) (Traffic), u K Prasad ban ïakren halor kane ka jingshah leh shiliang khmat kitei ki nongñiah kali kamai Tourist.
Haba kren sha ki lad pathai khubor, u President ka AKMTTA, Bah Ricaldinus Dohling u la ong ba na ka liang kitei ki nongñiah kali kamai Tourist ynda ki la mih ban leit pynïeng ïa la ki kali sha kiwei pat ki jaka kiba kham kyndong khnang ban lait na kano-kano ka jingdheng kali ruh, hynrei ka jingshah khnap ki kali jong ki ha ki pulit pynïaid kali ka dang ïai jia beit. U la ong kaei kaba kham sngewlyngngoh pat ka long ba ki kali kamai Tourist kiba dei na ka Jylla Assam ki ïoh ban ïeng katba ki mon ha Khyndailad khlem kano-kano ka jingshah daiñ kuna ne ka jingshah pyndik ha ki pulit pynïaid kali.
“Ngi kum ki Tourist taksi ha man la ki jaka kiba don ha Sor Shillong, ngim don jaka ha kano-kano ka bynta ban pynïeng ïa ki kali hynrei lada pynïeng ki kali jong ki ‘riew shimet pat kam ju don ka jingkhnap ïa kitei ki kali da ki pulit pynïaid kali. Kane baroh khoit, ka thew ïa ka jingshah ban beiñ ki nongñiah kali kamai, hato ngim don ka jingsiew khajna?”, ong u Bah Ricaldinus.
Ha ryngkat ka jingpyni ïa ki sakhi-sabut kaba la ïoh ban ring ha ki thaiñ Khyndailad, la ïohi ba ki pulit pynïaid kali ki la beh tang ïa ki Tourist taksi ba la ñiah da ki paradoh-parasnam ha ka por mynstep katba ïa ki kali Tourist na Assam ba la pynïeng ha ka por 1 baje nohphai sngi shaneng pat hajan ka Vivanta Hotel ym shym la don kano-kano ka jingshah beh kaba pynpaw ba ka don kaei-kaei ka jingshim pisa kaba sha lyndet hapdeng ki pulit pynïaid kali bad ki nongpynïaid ïa ka jaka pynïeng kali kaba don ha Khyndailad.
“Ngim ïohlad ban thep wat tang 2 tylli ki kali ruh ha katei ka jaka pynïeng kali hynrei ngi ju shah beh kum ki ksew ha ka por mynstep”, ong u Bah Ricaldinus.
Nalor kata, u Bah Ricaldinus u la ong ba na ka liang u SP, u la pyntip ba ka Sorkar Jylla ka la dep ban thaw da ka komiti kaba la pynkhamti ha ki Additional Magistrate ban peit bniah halor kane ka kam ban lah pynbit-pynbiang ïa ki jaka pynïeng kali kiba paka.
