Shillong, Lber 05
U Myntri Rangbah ka Jylla, Conrad K Sangma, u la ong ba ka Sorkar Jylla kam pat ju ïakren halor ka mat ban tyrwa pyntreikam ïa ki katto-katne ki kyndon jong ka Article 371 ka Riti Synshar ka Ri ha Meghalaya.
Haba jubab ïa ka jingkylli ba la wanrah da u MLA ka VPP na North Shillong, Bah Adelbert Nongrum ha ïingdorbar ha ka Sngi Balang, u Conrad u la ong ba ki don ki jingmyntoi bad jingduna jong ka Khyrnit ba Hynriew bad ki don ruh ki jingmyntoi bad jingduna jong ka Article 371.
“Lada phi peit sha ka Sixth Schedule, ki don ki kyndon ba lah ban don ïa ka Legislative Wing, Executive Wing bad Judiciary Wing katba ka Article 371 kam don satia ïa kine ki kyndon. Kumta, ka dei ka kam kaba hap ban ïakren bad ïatai”, u la ong.
Haba pynpaw ba ka Article 371 kam long kumjuh ïa baroh ki Jylla, u Myntri Rangbah u la ong ba ka Article 371 kam shym la kren eiei halor ka jingïada lane ban pyntreikam ïa ki aiñ ka Sorkar Pdeng.
“Ka jingmut jong nga ka long ba ka Article 371 kam long kumjuh ïa baroh. Ha ki Jylla bapher-bapher ki don la ki jong ki Article 371 bad ki kyndon ka jingïapher. Kumta, lada phi kdew ïa ki kyndon kiba don ha Nagaland, ka mut ba ïa kane ka kam ngi hap ban ïakren bad ïatai”, u la bynrap.
U la ong ba ka dei ka kam kaba hap ban peit bniah na baroh ki liang, namar ka Jylla ka don ïa ka Khyrnit ba Hynriew kaba don ïa ka Legislature Wing, Judiciary Wing bad Executive Wing ki bym don satia ha ka Article 371.
“Mynta kaei kaba ngi jied? Ngam lah ban tip la kane ka dei ka rynsan kaba dei ban ïakren ïa baroh kine kiei-kiei namar ka dei kaba hap ban ïatai”, u la ong.
Ha kawei ka liang, u Myntri Rangbah u la pynpaw ruh ba ka jingkylli ban wanrah ïa ka Uniform Civil Code (UCC) hapoh ka Jylla kam mih satia.
“Ngi la kren shai bha ba kam mih satia ka jingkylli ban wanrah ïa ka UCC ha ka Jylla jong ngi lane ba ngin pyntrei ïa kano-kano ka kam ba ïasyriem kum kata” la ong u Conrad.
