Nongpoh, Lber 05
Ki bor ba dei khmih jong ka tnat Kamrup Metro Excise ka Jylla Assam, ha ka 4 tarik u Lber 2025, ki la ïoh ban kem noh ïa uwei u briew ba la suba ba dei u ‘Mastermind’ lane u khlieh ba pynïaid ïa ka kam shna kyiad beaiñ ha Lad Umroi, Nongsder ïa uba la tip kyrteng kum u Prag Raj Singla.
Kum ban pynpaw biang hangne, ki bor ba dei khmih ïa ka tnat Excise ka Ri Bhoi ryngkat bad ka tnat Excise na Kamrup Metro jong ka jylla Assam lem bad ki pulit ka thanat Umïam ha ka Sngi U Blei, kata ka 2 tarik u Lber, 2025, ki la pynlong ïa ka jingkhynra ha ki bynta jong ka Umïam EPIP bad Lad Umroi jong ka surok Umroi Bypass halor ka jingdon jong ka karkhana shna kyiad beaiñ bad ïoh ruh ban kurup ïa bun ka kyiad beaiñ ryngkat ki tiar ki tar kiba la pyndonkam ban shna kyiad.
Katkum ki tyllong khubor ba la pynmih ha ka jylla Assam, la ïathuh ruh ba ïa utei u Prag Raj Singla la rah sha ka ïingbishar ha ka Sngi Balang bad ka jingtohkit pyrshah ïa u ka dang ïaid shaphrang.
Kum ban shu kdew, kane kam dei shuh ka sien ba nyngkong ba u Prag Raj Singla u la shah kem ha ki bor ka tnat Excise jong ka jylla Assam, hynrei u dei ruh uba la shah kem teng la bunsien halor ka jingshna ïa ki karkhana shna kyiad beaiñ kum ha Krokrajhar ha u snem 2024 bad ha kiwei de ki jaka ka jylla Assam ha ki por bad ki snem ba la dep.
