Shillong, Lber 05
Ka Sorkar Jylla ha ka Sngi Balang ka la kular skhem ban pyntreikam pura ïa ka aiñ Narcotic Drugs and Psychotropic Substances (NDPS) bad pynshitom ruh ïa kito kiba donkti ha ki kam be-aiñ haba ïadei bad u drok.
“Ka Sorkar ka kular skhem ban pyntreikam pura ïa ka aiñ NDPS. Uno-uno uba donkti ha kum kine ki kam be-aiñ yn pynshitom katkum ka aiñ, bad yn ym don jingmap ha ka sienjam jong ngi ban ïakhun pyrshah ïa ki kam be-aiñ ba ïadei bad u drok,” ong u Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong haba wanrah ïa ka jubab halor ka ‘Call Attention Notice’ ba la wanrah da u MLA ka Mawryngkneng, Bah Heaving Stone Kharpran.
U la ong ruh ba ka Sorkar dang shen ka la shim ka sienjam ba kongsan ha ka jingïakhun pyrshah ïa u drok da kaba thaw ïa ka kam na bynta ka Superintendent of Police, Anti-Narcotic Task Force (ANTF), ha ryngkat ka jingpynïeng ïa ka ANTF Police Station na bynta ban khmih bniah, peitngor bad tohkit ïa ki mukotduma halor ka NDPS.
U Bah Tynsong u la pynsngew ruh ba na ka liang ka Sorkar ka la pyntip haba ïadei bad ka jingthaw ïa ka ‘Advisory Board’ ha ka 30 tarik Jylliew, 2023 hapoh jong ka Prevention of Illicit Traffic in Narcotics Drugs and Psychotropic Substance Act 1988 (PITNDPS ACT) ban khmih haba ïadei bad ka jingshah kem jong kito kiba ngat biang ha ki kam khaïi drok katkum ki kyndon jong ka aiñ.
“Haduh mynta, 3 ngut kiba la ngat biang ha ki kam be-aiñ, la set katkum ki kyndon jong ka PITNDPS Act, 1988 bad ka jingtyrwa ban set ïa uwei pat uba la ngat biang ha ki kam be-aiñ ka dang ïaid shakhmat,” u la ong.
Nalor kane, u la ong ba kum shi bynta ban pyntikna ïa ka jingpynduh pyndam ïa ki mar pynbuaid ba la kurup – kiba la ïoh kurup ha ki 56 tylli ki jingjia bapher-bapher, la thang noh ha ka 23 tarik Kyllalyngkot, 2025 ha ki jaka thang ding jong ka Star Cement, Lumshnong, East Jaiñtia Hills.
Kine ki kynthup ïa 2.9977 kilo u ‘Heroin’, 2,561,989 kilo u kynja, 10.16 kilo u ‘White Crystal Meth’, 2.771 kilo u dawai kuli ‘Yaba’, lem bad kiwei-kiwei.
U Symbud Myntri u la ban biang ba ka Sorkar ka ïeng skhem ha ka rukom treikam jong ka ban ym pdiang satia ïa ki kam ba ïadei bad u drok, da kaba pynskhem biang ïa ka jingangnud jong ka ban pynduh jait shi syndon ïa une u jingdih na ka imlang-sahlang.
“Shuh-shuh, ki kam bapher-bapher ki dang ïaid ban pynsngewthuh bad pyntikna ïa ka jingwan lang jong baroh ki tnad treikam ba dei khmih hapoh ka Drug Reduction, Elimination and Action Mission (DREAM), kaba mynta ka treikam hapoh ka jingkhmih jong u Director ba pura,” u la ong.
Ha kawei ka liang, halor ka jingïoh kurup ïa 235 bilor ka kyiad bad 10 kilo tam u kynja na Mawryngkneng, u Bah Tynsong u la ong ba ki pulit ki la kem mardor ïa 1 u nongñiah bad 2 ngut kiba shong hapoh ka kali bad la pyntip mardor ïa kane sha ki heh ophisar.
“La bud ryntih ïa baroh ki kyndon aiñ kiba donkam bad la pynlong ïa ka jingpeit bniah halor ki mar ba la ïoh kurup, kaba la pyntikna ba dei u kynja. Ha ka jingpeit bniah shuh-shuh, la lap ba ka jingkhia jong une u kynja ba la ïoh kurup ka long kumba 10.455 kilo,” u la ong.
Shuh shuh u la bynrap ba la pynngat mukotduma hapoh ka Mawryngkneng Police Station Case No. 03(02)2025, hapoh ka Section 20(b)(ii)(B)/29 jong ka NDPS Act, bad kine kiba shah kynnoh mynta ki don ha ‘Judicial Custody’.
“Ki pulit ki pynlong ïa ka jingtohkit kaba hok bad kaba bniah haba ïadei bad kane ka kam,” u la ong.
