Shillong, Lber 05
Ki MLA ka Voice of the People Party (VPP) kiba kynthup ïa u Bah Ardent Basaiawmoit bad Bah Adelbert Nongrum ki la kyrshan ïa u MLA ka Mawlai Bah Brightstar-well Marbaniang uba la wanrah da ka jingïatai kaba lyngkot ha Dorbar Mang Tyngka halor ka jingkren u Myntri ka Sorkar Bah Kyrmen Shylla kaba u la sot na ka kotkhubor ba la pynmih ha U Nongsaiñ Hima ka 26 tarik Rymphang 2025 kaba ong, “Ai ba ki paid ka Jaiñtia kin rai halor ka lynti rel, nai tuklar kiba nabar.”
Katba ki MLA ka UDP kiba shong ha liang synshar ki la kyrshan ïa ka jingkren u Bah Kyrmen Shylla kiba kynthup ïa u Bah Renikton Lyngdoh, Bah Lahkmen Rymbui bad Bah Nujorki Sungoh.
Katba ki MLA ka UDP ki pynpaw ba kaei ba kren u Bah Kyrmen ka dei namar ka shong ha ki paidbah ka Jaiñtia lada ki pdiang, ai ba ka lynti rel kan ïaid shakhmat lada ki paidbah ki pyrshah kam lei-lei lada sangeh noh.
Ki la ong ba kane ka jingkren u Bah Kyrmen kam don kano-kano ka jingkren pyrshah jaidbynriew.
Haba wanrah ïa ka “Short Duration Discussion” ne ka jingïatai ba lyngkot, u Bah Brightstarwell u la ong ba ka VPP kam pyrshah ïa ka lynti rel hynrei ka Sorkar ka dei ban don ïa ki aiñ kiba khlaiñ ban ïada na ka jingwan rung kyrthep ki bar jylla hapoh ka jylla.
U la kdew ruh ba ha Meghalaya, ka rilum Garo ka la lah ban pynïasoh ïa ka lynti rel hynrei ha rilum Khasi bad Jaiñtia ki paidbah ki dang artatien ïa ka jingwan ka rel ka dei namar kim pat don ki aiñ kiba khlaiñ ban ïada ïa ka jingwan rung ki briew nabar ka jylla.
Kumta u la kyntu ïa ka Sorkar ba lada ka thmu ban wanrah lynti rel ka dei ban pyntreikam ïa ka Inner Line Permit khnang ban ïada ïa ka jingrung kyrthep ki bar jylla.
U la pynpaw ïa ka jingpynrem kaba jur ïa ka jingkren u Bah Kyrmen Shylla ban ong ïa kiba nabar ban ym tuklar haba ïadei bad ka lynti rel namar um sngewthuh kiei kita kiba nabar hynrei kum ka jaidbynriew ki dang ïatylli namar “Khynriam u Pnar u Bhoi u War, Maram Lyngngam ki dei ki paid Khasi baïar.
Haba shimbynta, u Bah Ardent Basaiawmoit u la kyrshan ïa ka jingkren u Bah Brightstarwell namar ka jingkren u Bah Kyrmen Shylla ka long kumba pharia ïa ka jaidbynriew.
U la ong lada ki pnar ki leit thied jaka sha Mawlai, Laitkor, Nongthymmai ki pynithuh ïalade kum ki bym dei Khasi ne ki pynithuh ïalade kum ki para Khasi, kumta u la kyntu ban kiar haba pynïapher jaidbynriew.
U Bah Lahkmen Rymbui, MLA ka UDP u la pynpaw ka jingpyrshah ïa ka jingkren u Bah Brightstarwell bad u la ong ka jingïakren ka lynti rel ka la slem bha kaba la ïaid mynta la palat 20 snem namar ka jingpyrshah ki paidbah na Ribhoi District kaba la pynsahkut.
U la ong ba ki MLA Garo ki la kyrpad ïa ka Sorkar ban wanrah ïa ka lynti rel sha kiwei ki bynta jong ka rilum Garo, kumta ailad ïa ki paidbah na Jaiñtia ba kin rai la kin pdiang ne kin kyntait.
Katba u Bah Nujorki Sungoh u la ong lada wan ka lynti rel kan long ka jingaikam ïa ki samla bad ban pynduna dor ruh ïa ki mar ki mata.
U la ong ba ka UDP ruh ka pdiang ban wanrah lynti rel lada don ki aiñ ki ban ïada ïa ka jingrung kyrthep ki briew kiba nabar hynrei kaba kongsan dei ban sngap ïa ka sur jong ki paidbah.
