Shillong, Rymphang 05
U National President ka National People’s Party (NPP) uba dei ruh u Myntri Rangbah ka Jylla, Conrad K Sangma, u la ong ba hap ban shaniah ïa ki bor pynïaid ilekshon, bad hap ban pdiang ïa ka rai ba u paidbah u la ai, ym ban ong ba ka long kaba bakla haba kim jop ïa ka ilekshon bad haba ki jop pat ki ong ba ka dei ka biang.
Ïa kane u Conrad u la ong haba kylli, la ka Sorkar kan phah tohkit halor ka jingkynnoh jong u President ka Voice of the People Party (VPP), Bah Ardent M Basaïawmoit uba la ong ba ka ilekshon kaba laitluid bad khuid ka la long tang ha KHADC ym ha JHADC.
Haba ïakren bad ki lad pathai khubor ha ka Sngi Balang, u Nongïalam ka NPP u la ong ba hap ban shaniah ïa ki ophisar jong ka Meghalaya kiba pynïaid ïa ka ilekshon.
“Katno tylli ki polling station phi kwah ban phah tohkit? Phi hap ban shaniah ha ki bor pynïaid kine ki dei ki ophisar jong ngi, ym dei ma ngi kiba don ha ki polling station lane ki briew jong ki seng ki don ha polling station”, u la ong.
U la ong ba lada peit ïa ki jingmih ha ki ilekshon, ki don ki polling station ba sar lut tang kawei ka seng saiñpyrthei bad kam dei kaba bakla. “Hooid, ki don ki polling station ba sar lut tang kawei ka seng bad kam don eiei kaba bakla. Ym pat ba ha baroh ki polling station yn sar beit tang kawei ka seng, ha kiwei ki polling station lah ban sar lut sa da kawei ka seng bad sa shawei pat ki polling station sa da kawei ka seng ka sar. Lada long kumta te hap ban leit tohkit lut ha baroh ki polling station”, la ong u Conrad.
U la ong ba kam lah ban long kumba la kynnoh, bad bynrap ba u MLA ka Jowai, Bah Wailadmiki Shylla u la kren ïa kaba dei. “Phi hap ban pdiang ïa ka rai ba u paidbah u la ai. Tang namar mano-mano ki khlem jop ha kita ki polling station phin ong ka la bakla, ha kiba phi jop pat phin ong ba ka dei ka biang, kam lah ban long kumta”, la bynrap shuh shuh u Nongïalam ka NPP.
