Shillong, Lber 05
U Myntri Rangbah ka Jylla, Conrad K. Sangma ha ka Sngi Balang u la ong ba ka Sorkar kan pynshitom da kaba tyngeh ïa kino-kino ki karkhana kiba treikam hapoh ka Jylla lada lap ba kim bud ryntih ïa ki kyndon aiñ ba ïadei bad ka jingpynjaboh.
U Sangma u la ong ïa kane haba jubab ïa ka ‘Call Attention Notice’ ba la wanrah da u MLA ka Jirang, Bah Sosthenes Sohtun halor ka jingtip ba la ai da ka Central Pollution Control Board (CPCB) haba ïadei bad ka jinglong-jingman ka jingjaboh ka lyer ha ka thaiñ Byrnihat.
“Nga kwah ban ong ba ki la don 2 tylli ki jingwad bniah kiba la leh bad namarba ka Byrnihat ka dei ka jaka khappud bad don ïa ki karkhana ha baroh arliang, ka don katto-katne ka jingjaboh na baroh arliang. Kumta ban ong ba ka jia tang ha Meghalaya ne ha Assam kan ym ïahap bad kan eh ban kdew halor kane,” ong u Sangma.
Ha kajuh ka por, u la ban jur ba baroh 2 tylli ki Sorkar Jylla kin hap ïatreilang khamtam na ka liang ki State Pollution Control Board (SPCB).
“Nga la dep thoh ruh sha u Myntri Rangbah ka Assam bad kyrpad ïa u halor kane kajuh ka bynta ba namar ka jinglong-jingman ka jingjaboh ka lyer ha Byrnihat (Air Quality Index-AQI), ki ar Jylla lem bad ki Pollution Control Board kin hap ïatrei bad ïansnohktilang bad kane kan sa sdang,” ong u Myntri Rangbah.
U la ong ruh ba katkum ki jinglum jingtip ba la kdew ha ki lad pathai khubor, lah ban kdew ba ka AQI kaba hap hapoh ka kyrdan ‘Very Poor’ la ïoh na ka jingtip kaba don ha Byrnihat, Assam lyngba ka ‘Continuous Ambient Air Quality Monitoring System’ ha ophis ka Central Academy jong ka State Forest Service, Byrnihat, Assam, ba la pynïeng da ka Pollution Control Board, Assam.
Kane ka jinglum jingtip ka dei ha ka 26 tarik Kyllalyngkot, 2025 ha ka por 4 baje janmiet.
Ha kawei pat ka liang, u la ong ba katkum ki jinglum jingtip na ki 4 tylli ki ‘Monitoring Station’ ka Meghalaya State Pollution Control Board (MSPCB), ka AQI jong ka Byrnihat ha u Kyllalyngkot, 2025, ka pynpaw ba ka long kaba pynhun na bynta lai tylli ki jaka bad ‘kat ban biang’ tang ha Export Promotional Industrial Park, Byrnihat, Meghalaya.
Haba ban biang halor ka jingïatreilang na ka liang ki ar Jylla kumjuh ban shim ki sienjam halor kane na bynta, u Sangma u la ong, “Ngi hap ban leh eiei na lade shuwa ban kynjoh ïa ka Assam ha kaba ngin hap leh da kaba tyngeh pyrshah ïa la ki jong ki ‘Unit’ kiba pynkheiñ ïa ki kyndon aiñ.”
U la pynsngew ruh ba ha ki saw tylli ki jingjurip ba kynsan-kynsan na ka liang ka MSPCB, la lap ba ki don katto-katne tylli ki karkhana kiba pynkheiñ kyndon, bad la phah shithi ban khang noh ïa ki.
“Nga phah ka khubor kaba shai sha baroh ki shnat karkhana kiba don hapoh ka Jylla ba ka MSPCB kan pynlong ïa ki jingjurip ba kynsan-kynsan na ka por sha ka por ha kiba bun ki jaka,” u la ong.
Shuh shuh u Myntri Rangbah u la byntap, “Nga la hukum ïa ka Board ba ki dei ban pynlong ïa ki jingjurip ba kynsan-kynsan bad pynshitom mar-mar lada kim bud ryntih ïa ki kyndon, bad ngi la pyni nuksa da kaba khang ïa hynñiew tylli ki ‘Unit’. Kane kan bteng bad lada don kino-kino kiba pynkheiñ kyndon, ka Sorkar kan pynshitom pyrshah ïa ki.”
