Shillong, Lber 05
U Myntri Rangbah ka Jylla, Conrad K Sangma u la ong ba un ïakren bad ka Sorkar India halor ka jingthoh ba u la ïoh na ki MLA ka Garo Hills kiba la pynpaw ba kwah ban pynïaid ïa ka lynti rel na Mendipathar sha Baghmara shaduh Dhaka, Bangladesh.
“Hooid, ngan sa rah ïa kane ka jingpynsngew ba ki la phah sha nga, ngan kyrpad na ka Ministry, ngin sa ïakren lehse ngin ïakren shwa kumto. U Myntri ba dei khmih ruh uba don ka jingïadei ba jan bha bad nga. Ngan ïoh beit ban ïakren bad u bad ngin sa ïapeit pat, namar nga la kren shai ba ngin ïakren shwa bad ki paidbah”, la ong u Myntri Rangbah haba ïakren bad ki lad pathai khubor ha ka Sngi Balang.
U Conrad u la ong ruh ba ha shwa ba ka Sorkar kan ïaid shakhmat ïa kane ka kam, kan ïasyllok shwa bad ki paidbah ha Garo Hills ban sngap ïa ka jingsngew jong ki.
“Ngi la kren shai bha ba ngin ïakren shwa ïa ki paidbah bad kiba don bynta baroh, ngin sa peit kumno ki paidbah ki sngew bad kaei ka jingpyrkhat jong ki halor kane ka jingthmu, bad lada ngi ïoh ïa ka jingmynjur lang na ki paidbah, ngan sa shim khia ba ngin lah ban wanrah ïa ki jingtei ym tang ka jingpynlut kaba heh ïa ka thaiñ, hynrei kan dei ruh ka jingkyntiew ïa ka ïoh ka kot jong ka thaiñ khamtam ïa ki nongrep bad ki nongtrei kam lajong”, u la ong.
Ha ka Sngi Ba-ar saw ngut ki MLA na South Garo Hills ki la aiti ïa ka dorkhas ha u Myntri Rangbah ka Jylla na ka bynta ban pan ïa ka lynti rel na Mendipathar, North Garo Hills shaduh Baghmara ha South Garo Hills lyngba ka Nongal lane Tura, bad ban pynpoi ruh shaduh Dhaka khnang ban kyntiew ïa ka ïoh ka kot jong ka Jylla lyngba ka khaïi-pateng bad ka ri Bangladesh.
Ki MLA kiba la leit ban aiti ïa ka dorkhas ha u Myntri Rangbah ki kynthup ïa u Rakkam A Sangma MLA ka Rongara Siju, u Kartush R Marak MLA ka Baghmara bad u Sengchim N Sangma uba dei u MLA ka Chokpot.
