Nongstoiñ, Lber 06
Ka jingap khmih lynti jong ki paidbah halor ka bynta ba ar (2nd phase) jong ka surok Rambrai-Kyrshai haduh Chaygoan, ka dang ïai sah haduh mynta khlem pat don satia kino-kino ki dak ban pyntrei.
Lah ban kdew hangne ba ïa ka bynta kaba nyngkong ne ka 1st phase jong katei ka surok mynta la lah ban pyndep haduh ka shnong Mawthir ha West Khasi Hills.
Halor kane ka phang bad ka jingsahteng jong katei ka surok, na ka liang ka Federation of Khasi Jaiñtia & Garo People (FKJGP) Rambrai Circle, ha ka 6 tarik u Lber ka la leit ban ïakynduh ïa u DC ka West Khasi Hills ban wad jingtip.
U President ka FKJGP Rambrai Circle, Bah Jisyarlan Lyngkhoi haba kren sha ki lad pathai khubor hadien ka jingïakynduh ïa u DC u la ong, ka bynta ba ar jong katei ka surok ka dang sah ha lyer bad kam pat don satia kano-kano ka jingmang pisa ban pyntrei namar ïa ka jingmang pisa barim la dep pyndam namar ka jingheh palat ka dor bai khyndew.
Halor kane ka bynta, ka FKJGP ka dawa jur na ka Sorkar Jylla ba kan pynkloi ban mang tyngka thymmai khang ban ïoh sdang noh ïa ka bynta kaba sah jong katei ka surok.
