Shillong, Lber 06
U Myntri Rangbah ka Jylla, Conrad K Sangma u la pyntip ba ka Sorkar Jylla ka la pynlut haduh T.97.68 klur ban shna haduh 3230 tylli ki pung dohkha naduh u snem 2020 haduh 2024 na ki skhim bapher bapher.
Ka jingjubab u Conrad Sangma ka dei halor ka jingkylli ba la wanrah da u MLA ka VPP na Mawryngkneng Konstitwensi Bah Heavingstone Kharpran ha ki kynta kylli jingkylli hapoh ka ïingdorbar mang tyngka ha ka Sngi Palei.
U Conrad u la pyntip ba naduh u snem 2011 ka jingpynmih dohkha ka long saw hajar metric ton bad haduh mynta ka jylla ka la lah ban pynmih dohkha haduh arphew hajar metric ton.
Shuh shuh u la pyntip ba ka jingdonkam dohkha hapoh ka jylla ka long 32 hajar metric ton; kaba mut 20 hajar metric ton la pynmih napoh ka jylla bad kaba sah 12 hajar metric ton la wanrah nabar ka jylla.
Ha kawei pat ka jingkylli, ka Myntri tnat ka rep ka riang ka Kong Ampareen Lyngdoh ka la pyntip ba ka jingpynmih ïa u synsar hapoh ka jylla ka long haduh 66,831 metric ton jong u snem 2022-2023 bad ha u snem 2024-2025 la pynmih haduh 75,680 metric ton.
Ka Kong Ampareen Lyngdoh ka la jubab ïa kane haba buh jingkylli da u MLA ka UDP na Amlarem Bah Lahkmen Rymbui ha ki kynta kylli jingkylli.
Ka Kong Ampareen ka la ïathuh ba ka dor u synsar ka long T.12,188 shi quintal ha u snem 2022-2023, ha u snem 2023-2024 u synsar u la hiar dor namar ka poi T.8,400 shi quintal bad ha u snem 2024-2025 ka dor u synsar ka la nang hiar dor namar ka poi haduh T.4,685 shi quintal.
Ha kawei pat ka jingkylli, u MLA ka Mawlai, Bah Brightstarwell Marbaniang u la buh jingkylli ba shwa ban ai rong sawdong ïa ka surok hakhmat Secretariat la dep ïoh ne em ka jingbit na ka tnat PWD National Highway lane ka Ministry of Transport and Highway jong ka Sorkar India, u Bah Sniawbhalang Dhar uba dei u Myntri ka tnat Pynroi Sor u la jubab ïa kane da kaba ong ïa kane tharai la ïoh jingbit namar ba ka PWD ka don bynta lang ha kane ka projek.
Kumjuh u Bah Bright u la buh jingkylli ba katno la mang ban pynlut na ka bynta kane ka jingthmu, u Bah Sniawbhalang u la ong ba ïa kane ym pat shym la mang pisa namar ba ka dei ka projek ba dang shu pyrshang bad u la ong ba ïa ka jinglut jingsep yn sa wanrah ha ïingdorbar ynda la dep pynbiang lut.
