Shillong, Lber 06
Hadien ka jingïoh jing-tip ba u Vice-Chancellor ka North Eastern Hills University (NEHU), Prof. P.S Shukla u lah ban wanphai biang sha kane ka skulbah, na ka liang ka North Eastern Hills University Student Union (NEHUSU) ryngkat ka jingïatreilang bad ka Khasi Students’ Union (KSU) NEHU Unit ki la pynlong biang ïa ka jingïakhih da kaba khang tala ïa ki phalor ban rung shapoh ka skulbah.
Ki nongïalam jong ka NEHUSU ryngkat ki nongïalam jong ka KSU NEHU Unit ki la sdang ïa ka jingkhang tala ïa baroh ki phalor ki ban rung shapoh kane ka skulbah naduh ka por mynstep hynrei ki la pyllait tang na ka phalor ba-ar ba kin ïoh rung bad mih ryngkat ka jingap pahara khnang ban lah pyntikna ba u VC un ym ïoh lad ban rung shapoh ka skulbah.
“Ngi la leit ruh ban khang tala ïa ka ophis treikam jong u Vice-Chancellor P.S Shukla ha ryngkat ka jingap pahara ha baroh ki khyrdop ki ban rung shapoh kane ka skulbah khnang ban lah pyntikna ba u VC un ym ïoh lad ban rung shapoh ka skulbah,” la pynpaw ki samla.
Ha ka jingïakren bad ki nongïalam jong ka NEHUSU ki la pynpaw, “Wat hapdeng ka jingdon jong ki ïa ki eksamin hynrei ki la hap ban mih shakhmat ban pyrshah jur ïa ka jingthmu jong u VC ban wanphai biang shapoh ka University.” Kine ki samla ki la pynpaw ruh ba ki ïeng halor ka nongrim ba ki la dawa, ba u VC u dei beit ban iehnoh ïa ka kam Vice-Chancellor jong ka NEHU.
Kine ki samla ki la pynpaw ruh ba ki eksamin kiba mynta ki dang ïaid shakhmat ki ban sa kut ha kine ki taïew ban wan kin ïaid beit kumba ki long namar na ka liang jong ki kim kwah ban don kano-kano ka jingpynthut ïa ki eksamin jong ki para samla pule. Ki la pyntip ruh ba na ka bynta ka leit ka wan jong ki samla pule kiba shabar bad napoh ka skulbah ki bos kin ïaid kumba ki long man la ka sngi.
Ki nongïalam jong ka NEHUSU bad KSU, NEHU Unit ki la pyntip ba haduh mynta kin ïai bteng ban khang beit ïa baroh ki phalor ki ban rung shapoh jong ka skulbah lait noh tang na ka phalor (gate) ba-ar ba ki lah ban rung ban mih.
