Shillong, Lber 06
Ka Seng Samla Mawlai Pyllun (SSMP) ka pynpaw ïa ka jingsngewdiaw kaba khraw halor ka jingleh khlem akor bad bret pathar jong ki briew ïa ki ñiut na la ki ïing bad dukan ha shi lynter ka surokbah shwa ban poi ka khyrdop jong ka Marten.
Kane ka jingpynpaw jong ka SSMP ka la long hadien ba ka kum ka seng ka la ïoh ïa ki jingujor bad ha kaba ka la pynrem jur ïa kito ki briew ba khlem akor la ki dei ki riewspah ne baduk, ki nongkhaïi doh ne dohkha, ki snep dohkha, snier bad snep syiar kiba wan bret pathar ïa ki ñiut, ki ksew, ki miaw ba la ïap la pyut, ki snep masi ki doh pyut da ki kali, ka long pynban ka jinglehraiñ ïa ki la ha ïing ne ha dukan ki leh khuid katba tang kaba lait nangta kaba mut shabar na la ïing ki dei kiba leh sih shu bret pathar sha ki jaka bym dei.
Ha ka kyrwoh khubor ba la pyllait da u General Secretary ka SSMP u samla Eddiewigh Majaw, la ong ba ka seng ka la ïoh jingujor ruh ba don ki briew kiba wan da ki kali remdor kiba pynlang ñiut ha ki plastic ynda la poi ha kine ki thaiñ ryngkat ka her stet ka kali, ki shu kawang ïa ki ñuit sha kine ki jaka.
Ka seng ka wer ïa ki paidbah nongshong shnong kumjuh kiba ïaid na kine ki bynta la ka dei kiba shu ïaid kjat ne da ki kali ba kin sngewbha ban kem ne shondur ïa ki briew ne kali number plate ïa kiba bret ñiut pathar ban daiñ kuna kaba heh nangne shakhmat ne pyntip sha ki nongïalam shnong ne sha ka Seng.
Ka Seng ka kyntu ruh ïa ki bor ba dei peit ïa ka Marten kata ka Shillong Municipal Board ba kin buh noh da ki CCTV ha kine ki bynta khnang ban lah ban ïoh kem ïa ki riewkhlem akor. “Ka long kaba isaitmet bad ka jingpynrem kaba khraw ïa kito ki briew kiba nang tang ban lehkhuid, leh stai, deng tai, deng ksiar, don kali rem dor katba ïa ka ñiut na ïing la shu bret sha surok tangba la lait na ïing,” ong ka kyrwoh na u Samla Eddiewigh Majaw.
