Shillong, Lber 06
Ka Ïingdorbar Thaw Aiñ jong ka Jylla ha ka sngi Palei ka la kyntait ïa ka jingtyrwa jong u Nongïalam ka Liang Pyrshah ban shim ïa ka rai ‘resolution’ ban pynlong ïa ka Tura ka Nongbah Tlang lane ka ‘Winter Capital’.
Haba wanrah ïa kane ka mat ba kyntu ïa ka Sorkar ban bishar bniah, u Dr. Mukul u la ong ba ka daw kaba u la wanrah ïa kane ka mat ka long halor ka jingthmu ban wanrah ïa ka thong jong ki nongïalam ba mynshwa ban ïasam ïa ka jingmut ka jinglong kawei kum ki jaitbynriew ha ka Jylla ba kynthup ïa ki Garo, Khasi bad Jaiñtia.
U Dr. Mukul u la ai ka jingkyrshan ruh ïa ka jingleh ka Sorkar ban pynlong ïa ka jingïalang ka Kynhun Myntri (cabinet) ha kylleng ki jaka kum ha Jowai, Sohra bad ha kiwei ki jaka, ha kaba u la pynpaw ruh ba lada ka long lei-lei, kan bha ban pynlong ïa ka dorbar thaw aiñ ruh sha kiwei ki jaka bad district headquarter.
U Dr. Mukul uba dei u Myntri Rangbah barim u la kyntu ïa ka Sorkar ba kan eksamin ïa kane ka mat kaba u la wanrah ban pynlong nongbah tlang ha Tura bad ban pynlong ruh ïa ka dorbar ha kiwei ki jaka jong ka Jylla.
“Kane ka mat kaba nga wanrah kam dei ka jingleh politik, hynrei ka dei ka jingkwah jong ki paidbah ban ïasam lem ïa ka jingsngew long kawei ban wanrah ïa ka jingïaieid bad ka jingïatylli hapdeng ki jaitbynriew ha ka Jylla”, la ong u Dr. Mukul.
Haba jubab halor kane, u Myntri Rangbah ka Jylla, Conrad K Sangma u la ong ba u la ïohpdiang ïa kane ka jingtyrwa na ki kynhun bapher-bapher na Garo Hills, bad pyntip ba u la ïakynduh ruh ïa kita ki kynhun.
“Kane ka kam jong ka ‘Winter Capital’ ka dei kaei-kaei kaba ngi la don jingsngew bad bun ki kynhun ki la wan ïakynduh ïa nga. Nga la ïakynduh la jan baroh ki kynhun kiba la wan ban ïakren ïa kane ka kam”, la ong u Conrad.
Katkum ka jingong u Myntri Rangbah, kaba donkam ka long ban pyntyllun ïa ki kam pynroi sha baroh ki bynta ka Jylla khlem kano-kano ka jingleh shiliang. U la ong ba kaba donkam ka long ban wanrah ïa ki kam pynroi shajan ki paidbah khnang ban lait na ka jingsngew khunswet.
“Ka Sorkar ka la leit pynlong ïa ki jingïalang jong ka Kynhun Myntri sha kylleng ki jaka jong ka Jylla, kynthup ha Tura, Jowai, Sohra bad Resubelpara. Kum kine ki prokram ym lah ban shu kheiñ ïa ka jingpynlut. Lada phi phai khmat sha kane tang hangta ngin duh noh ïa ka jingmut ban rah ïa ka kynhun Myntri sha ki paidbah”, u la ong.
Haba kyntu ïa u Dr. Mukul Sangma ban weng noh ïa ka ‘resolution’ ba u la tyrwa, u Myntri Rangbah u la kular ban thaw da ka komiti ka ban shong bishar ïa ka jingdawa ban wanrah ïa ka ‘Winter Capital’ ha Tura, West Garo Hills.
U Conrad u la ong ba ki dkhot jong ka Liang Synshar kin ym lah ban kyrshan ïa ka ‘resolution’ namar ki katto-katne ki daw bad ka jingshisha ka long ba ha kine ki 53 snem ym pat ju don ka ‘resolution’ ba wanrah da ka Liang Pyrshah ban mynjur hapoh ka Ïingdorbar, bad bynrap ba kane kam mut pat ba ym ïasngewthuh ïa ka jingkongsan jong ka kam.
“Namar ba ngim lah ban ïaid lang bad ka resolution, nga lah ban buh noh da ka Committee ki seng saiñpyrthei. To ngin ïasyllok bad baroh ki kynhun na Khasi, Jaiñtia bad Garo kiei ki jingeh kiba don.
Nga kyntu ïa u Nongïalam ka Liang Pyrshah ban weng noh ïa ka ‘resolution’ namar ym pat ju don ka Sorkar ban mynjur ïa ka ‘resolution’ ba wanrah da ka Liang Pyrshah. Ka dei ka kam kaba eh hynrei namar ka ‘resolution’ to ngin ïakynduh bad ïashong bishar ban lah pynurlong ïa kane”, ong u Conrad.
Hadien ba la ïoh ïa ka jingpynshai bad kular na u Myntri Rangbah, na ka liang u Dr. Mukul Sangma u la weng noh ïa ka ‘resolution’ ban pynlong ïa ka Tura ka ‘Winter Capital’.
