Tura, Lber 06
Ka Bharatiya Janata Party (BJP) Tura ka la maham ïa ki nongshong shnong pyrshah ïa uwei u nongleh thok ba la tip kyrteng kum u Ajay Saha, ïa uba la kynnoh ba u la phone ïa ki nongshong shnong ban thok pisa ha ka kyrteng jong ka BJP na ka bynta ban pynbiang ïa ki skhim hapoh ka Pradhan Mantri Awas Yojana (PMAY) bad kiwei ki skhim ka Sorkar Kmie.
La kynnoh ba u Saha u la phone ïa ki nongshong shnong bad lum ïa ka pisa kaba long T.1000 haduh T.7000 ryngkat ka jingkular ba u dei na ka BJP bad ban pynthikna ba kin dei ki nongïoh jingmyntoi na kitei ki skhim. Ka kaiphod jong ka jinglum pisa jong u Saha na ka bynta kine ki skhim ruh la dep ban aiti sha ki pulit na ka bynta ban pynlong ka jingtohkit hadien ba la dep ban ujor ejahar ha ka 5 tarik mynta u bnai. La ong ba u number ba la pyndonkam da u Saha na ka bynta kane ka kam, u dei u 9233144235.
“Ngi kwah ban pyntip ba kum kine ki nongthoh bad nongleh shukor kim dei ki bynta jong ka BJP bad ka dei tang ka jingthmu ban pynthohbria ïa ka seng. Ngin ym map satia ïa kino-kino kiba donkti ha kane ka kam leh thok leh shukor ïa ki ‘riewpaidbah ba lui-lui. Shuh shuh lada don kino-kino ki ‘riewshimet kiba kwah ban aplai ïa kine ki skhim ki lah ban leh ha ka ophis treikam jong ka BJP kaba don ha Tura,” la pyntip u General Secretary u Wilver Greham M Danggo.
