Mawkyrwat, Lber 06
Ka Dorbar Shnong Mawsynram ka la pynpaw ïa ka jingsngewbitar kaba khraw halor ka jingkam jong u President ka ‘Kutumba Surakshya Parishad’ u Satya Ranjan Borah ha ki lad pathai khubor ha kine ki khyndiat sngi ba la dep, ba la shah ban mane blei laitluid hapoh ka krem Mawjymbuiñ kaba don ha Mawsynram, East Khasi Hills District.
Ka Dorbar Shnong Mawsynram lyngba ka kyrwoh khubor na u Bah RH Rapsang, Asst. Rangbah Shnong, u la ong ba kum ka Dorbar Shnong ka kwah ban pynshai namar katei ka jingkam jong u Satya Ranjan Borah ha ki lad pathai khubor ka wanrah ïa ka jingsngewpher jingmut bad jingsngewthuh bakla ïa ki para shnong para thaw.
U la ong, kumno u nud ban kam ba kita ki jingïakajia bad ki jingsngewpher jingmut baroh ki la poi shaba kut bad la shah ban mane blei hapoh krem Mawjymbuiñ. Kane ka jingkren jong u ka long tang ban ïoh burom ïalade bad ki jingmut arsap ban wanrah ïa ka jingsngewthuh bakla wat hapdeng ka Dorbar Shnong bad ki paidbah Khasi baroh kiba ju ai jingkyrshan ïa ka Dorbar Shnong ban ïeng skhem ban pyrshah ban pynlong jaka mane Blei ïa ka krem Mawjymbuiñ.
“Ngi la khang ïa u ban leh niam leh rukom hapoh krem Mawjymbuiñ bad ha ka por ba u mut ban theh da ka um ïa u Mawjymbuiñ ruh ngi la khang pyrshah hynrei une u nongïalam ka KSP u don hapoh krem tang hapoh shi minit hynrei u la ïoh ban shondur bad pynsaphriang sha ka pyrthei ba la ïoh ban leh niam hapoh kane ka krem bad kam ruh ba ki paidbah ka Mawsynram ki la pdiang burom ïa u,” la ong u Bah Rapsang.
“Ka jingthok ka jingshukor jong u, ka la pyndom bad pynbitar bad pynlong ïa ngi bad ngin hap rai da kaba tyngeh bad lada u dang nud ban wan biang sa ïapeit, byrngem tyngeh ka Dorbar Shnong Mawsynram ïa u Satya Ranjan Borah,” la bynrap u Bah Rapsang.
