Shillong, Lber 06
Ki samla pule jong ka North Eastern Hills University Student Union (NEHUSU) ryngkat ka Khasi Students’ Union (KSU) NEHU Unit ki la phah da ka jingthoh sha u Myntri ka tnad pule-puthi ka sorkar pdeng u Dharmendra Pradhan ban pynpaw ïa ka jingsngewkhia kaba khraw halor ka jingpynslem ka ‘committee’ ïa ka kaiphod halor ka jinglong-jingman hapoh ka skulbah NEHU.
Katkum ka kyrwoh ba la phah sha u Myntri, kine ki samla pule ki la pyntip ba hadien 16 sngi jong ka jingshah thngan kaba ki la pynkut ha u Nohprah 2024 ka long hadien ka jingkular na ka liang ka tnad pule puthi jong ka sorkar pdeng ban phah ïa ka committee kaba kyrpang ka ban khlieh da u Prof. D.P Singh, Chairman barim ka University Grants Commission (UGC) bad u Prof. Dilip Chandra Nath, Vice-Chancellor barim ka Assam University ban khmih bniah halor ki jingdawa jong kine ki samla pule. Hynrei haduh saw bnai kane ka ‘committee’ kam shym la ai kano-kano ka jingpyntip ne ka jinglap jong kane ka committee bad ki lad ki lynti kiba kane ka committee ka la dep ban shim.
Kine ki nongïalam jong ka NEHUSU ki la pynpaw ruh ïa ka jingkyndit bad ka jingpyrshah kaba jur halor ka jingkam jong u Prof. P.S Shukla ban sdang biang ïa ka kam na Delhi, da kaba pynpaw ba kane ka long ka bym pat ju jia mynno-mynno ruh. Kine ki samla pule ki la kyntu ruh ïa ka tnad ban ai ka jubab kaba kloi ban pynpaw halor ka jinglap jong ka ‘committee’ bad ban shim ïa ki lad ki lynti jong ka jingpynshitom.
“Lada ki bor ba dei khmih kim lah ban leh ei-ei na ka liang ka NEHUSU ha ryngkat ka KSU NEHU Unit ki long ba la kloi ban mih shakhmat ban bteng biang ïa ki jingïakhih ne ban shim da kiwei-kiwei pat ki sienjam ban pynbor ïa ka sorkar pdeng ba kan leh ei-ei” la ong u Sandy.
“Ngin ym pdiang ïa ka jingwanphai jong u Vice-Chancellor shapoh ka skulbah, ka jingleh ka jong u bad ka jingdkoh ha ka jingpynïaid beit pynïaid ryntih ïa ki kam kaba ngim lah ban pdiang bad ngi kum ki samla pule ngin ïai ban pyrshah jur ïa ka jingwan ka jong u,” ong u Sandy.
Kumta na ka liang ka NEHUSU ka la buh ïa ka jingkyrpad sha u Myntri ka tnad pule puthi ka sorkar pdeng ba u dei ban leh ei-ei bad ban shim ïa ki sienjam khnang ba yn lah ban pynbeit ïa ki jingeh jong ki samla pule.
