Shillong, Lber 07
Hadien ka jingpynbna ba la pynmih da u Secretary jong ka Kur Paliar Mawkyrda Laikpoh (Lai Kynthei) u Bah Elphedius Paliar ha ka 28 tarik, Rymphang, 2025, ban khot ‘tender’ ai wai ïa ka khlaw Hiang Diengsong, ka la mih ka jingpyrshah kaba jur bha na ki rangbah ka Kur Paliar kiba la pynpaw ba kum ka kur kam don jingtip ei ei halor kane. Kumta halor kane bynta na ka liang u Acting Lyngdoh jong ka Kur Paliar Mawkyrda Lai-kpoh (Lai Kynthei), u Bah Phaiborlin Paliar ha ka 7 tarik, Lber, 2025 u la ong ba ka jait Mawpyrdoi bad ka jait Sangleiñ kim lah satia ban tuklar ïa ka Kur Paliar Kpohbah.
Kum ban shu pynkynmaw hangne ba ka Kur Paliar Mawkyrda Lai-kpoh (Lai-kynthei) kaba kynthup ïa ka Kpohbah, Mawpyrdoi bad ka Sangleiñ ha ka 6 tarik u Lber 2025, ka la pynlong ïa ka jingïalang Dorbar kur ha ka shnong Mawpat kawei na ki shnong ha ka thaiñ Umdohlun South West Khasi Hills distrik ha kaba na ka liang u Bah Bresswell Paliar uba dei u Rangbah Kur bad ruh kum u Nongaibuit jong ka Kur Paliar, u la pynshai ba kum ka kur ka sngewkyndit ban ïohi ïa katei ka jingpynbna namar ka kur kam don jingtip eiei bad ong ba katei ka khlaw kam dei ka nongkynti jongno-jongno hynrei la dei trai hok da ka kur Paliar Mawkyrda Lai-kpoh (Lai-kynthei) kaba kynthup ïa ka Kpohbah, Mawpyrdoi bad ka Sangleiñ kiba shong ba sah hapoh ki hynriew shnong jong ka Ri Lyngdoh.
Haba kren sha ki lad pathai khubor ha Shillong Press Club halor kane, u Bah Phaiborlin u la pyni ruh ïa ka dulir kaba la shon muhor ha u snem 1878 da u Pa’iem Borsing Syiem uba dei u Syiem jong ka Hima Langrin ban pynshisha ïa ka jinglong trai jong ka Kur Paliar Mawkyrda Lai-kpoh (Lai Kynthei) ïa ka Ri Lyngdoh Kur Paliar Mawkyrda Kpohbah.
U Bah Phaiborlin u la ong ba katkum kane ka dulir ka pynshisha ba kane ka khyndew ka la hiar pateng ha ki khun kynthei na u Ksanlang bad u Sngi Lang, kiba kyrteng ka Phonlang, ka Mahlang, ka Iewphanmitlang Paliar Mawkyrda Kpohbah. Nangta, u la ong shuh shuh ruh ba kito kiba pyrshah ïa ka jingaiwai ïa ka khlaw da ka kur Paliar kim dei satia kiba don bynta ha ka jinglong trai ïa ka Ri Lyngdoh bad ong ruh ka jingkam trai ka jong ki, ka long tang da ka ktien namar ba kim lah satia ban pynshisha ïa ki dulir bad ki kot ki sla.
“Kim dei ki jait Paliar bad kim dei ki Lai-kpoh (Lai-kynthei) hynrei ki dei na kawei ka jait bad kata ka dei ka Jait Mawpyrdoi bad ka Jait Sangleiñ, kim don bynta eiei ruh em ban tuklar bad mushlia ïa ka hok ka jinglong trai jong ngi ki Paliar Kpohbah”, ong u Bah Phaiborlin.
Shuh-shuh, u Bah Phaiborlin ucla ong ba ka Paliar Kpohbah ka don ruh ïa ka nongrim kaba skhem ban kren pyrshah ïa kitei ki briew kiba muslia namar ka Paliar Kpohbah kam kren tang da ka ktien hynrei ka don ïa ki kot bad ki dulir ban pynshisha halor ka jinglong trai ïa ka khyndew-ka shyiap.
“Ki la shu kren bad kam tang da ka ktien hynrei wat tang shi dak ruh kim don ban pynshisha ba ki long trai hapoh ka khyndew Ri Lyngdoh. Ki lah ban kam ïa ka Sor Shillong bad ka pyrthei baroh kawei ba ka dei jong ki hynrei wat tang shi dak pat ban pynshisha kim don ha ka dulir”, bynrap u Bah Phaiborlin.
