Shillong, Lber 07
Ki paidbah nongshong-shnong kiba hap hapoh ka Hima Mawphlang ki la pynpaw ïa ka jingbynñiaw halor ka jingbym shimkhia jong ki ophisar bad karikor ka tnad PHE kaba don ha Mawphlang ban pyndep ïa shibun tylli ki kam kiba sahteng bad kiba la shu kylla long tang ka shynrong kaba khlem don ïa ka jabieng ban pyrkhat.
Kitei ki paidbah nongshong-shnong ki la ong ba bunsien ki la ju pynsngew halor ka jingbym treikam jong ka skhim sam um kaba la tip kum ka Jal Jeevan Mission (JJM) hapoh katei ka hima wat haduh kine ki sngi ba mynta, hynrei ym don pat ba patiaw ne ïohi ïa kata ka jingdonkam jong u duk-u suk uba don ha kane ka thaiñ.
Nalor kata, kitei ki nongshong-shnong ki la ong ruh ba ym tang katta hynrei ha kaba ïadei ka jingpluh ding kaba la jia ha ka 1-2 tarik eiei jong une u bnai Lber ha ka shnong lad Umrisain Mawphlang kaba dei ka jaka jong ka PHE, ka pynpaw ïa ka jingbym don nongap lane nongpahara ha katei ka thaiñ.
“Donbok ba ka khlem shym la jia eiei kaba sngewsih ha katei ka sngi namar kumba ngi sakhi ka ding ka la jan poi shajan ki ïing-ki sem jong ki briew, bad kane ka paw ba ki heh ophisar bad karikor kim don ïa ka jingkitkhlieh na ka bynta ka kam”, ong kitei ki nongshong-shnong.
Kitei ki nongshong-shnong ki la pynkynmaw ruh ba ha ka por ba dang don u Executive Engineer barim, Bah (L) S.K Sun, kam ju da kham don koit ka jingpluh ding ne ka jingkyrduh um namar u trei bad u kitkhia ïa la ka kamram da kaba u buh ruh ïa ki nongap khlaw kiba hap ban don ka jingkitkhlieh kumba long lem ma u, uba kitkhlieh ïa la ka kamram
“Kumta na ka liang jong ngi, ngi kyrpad ïa ki bor ba halor ba kin sngewbha ban phah da ki briew kiba lah ban trei ïa ka kam bad kiba sngew trai ïa ka kam kum u Bah (L) S.K Sun, kiba ïatreilang bad u paidbah ha ka eh-ka shon bad ha ka ïap-ka im jong u duk-u suk namar da ka long kumne kumba long mynta, kan poi ka por ba ngin hap ban pynsngew lem sha kiba kham halor ban ïarap lem ïa ki jingeh jong ngi u paidbah”, bynrap kitei ki nongshong-shnong.
