Shillong, Lber 07
U MLA ka Liang Pyrshah jong ka Voice of the People Party (VPP) na Nongkrem, Bah Ardent Miller Basaïaw-moit u la kynnoh ba ki ‘consultant’ kiba thung da ka Sorkar ban leh ïa ki kam bad ki projek, ki bunkam bad lapmiet ban ïalehkai PUBG.
Haba shim bynta ha ka jingïamir halor ka Mang Tyngka 2025-26 hapoh ka ïingdorbar ha ka Sngi Thohdieng, u Bah Ardent u la ong ba u la ïoh jingtip na kiba trei ïa ki kam kham hapoh jong ki ‘consultant’ ba barabor kita ki ‘consultant’ ba la thung da ka Sorkar ki shong beit ha kawei ka kamra, katba bthah pat ïa ki samla trai shnong kiba trei kham hapoh ban durut bad trei ha ki projek bapher-bapher.
“Kaba kham sngew sammut ka dei ba la ïathuh ïa ngi ba kita ki ‘consultant’ ba la thung da ka Sorkar ki pynlut bun ïa ka por jong ki ban ïalehkai PUBG”, la kynthoh u Bah Ardent, ha kaba u la ong ruh ba kane kam dei ka por ban shu khot ïa ki briew kiba shu shaniah beit ïa ki kam ha ki samla trai shnong, katba ki shim burom pat shalade.
Ha kawei ka liang u MLA ka VPP u la kynthoh tyngeh ruh ïa ki skhim ba la pynbna da ka Sorkar, ha kaba u la kynnoh ba ka Mang Tyngka ba la kren da u Myntri Rangbah, Conrad K Sangma ka long tang ban pynkiew skong ïa u.
U la ong ba ka dei ka sien ba nyngkong ban ïohi ba ki skhim ba bun la buh hakhmat da ka kyntien Myntri Rangbah (CM) kum ka skhim CM Farm, CM Elevate, CM Assured, CM Skills Mission, CMSDF, CM Scholarship bad ter-ter.
U la ong ba ha por ba u long MLA 10 snem (2008-2018) ka don tang kawei ka skhim ha ka kyrteng u Myntri Rangbah, ka Chief Minister Special Rural Development Fund (CMSRDF), bad hapoh kane ka skhim la ïoh bun jait ki skim man la u snem.
“Mynta ki don shibun ki skhim kiba sdang da ka kyntien CM, hynrei haduh mynta ngim pat ïoh ïa ka skhim CMSDF wat la ngi la dep phah ïa ka jingtyrwa sha ka Sorkar”, la ong u MLA VPP.
U la ong ba ki skhim ba la pynbna da ka Sorkar ki long beit ïa baroh, hynrei ha kane kaba mynta u lap ba kiba ïoh skhim la shu jied, bad paw ba kane ka Sorkar ka pyrshang ban wanrah ïa ki skhim ha kata ka rukom ban pynduh ïa ka hok ki Nongmihkhmat ba la shah jied ha ki paidbah.
“Ka paw ba ïa ki skhim la pynwandur ha kata ka rukom ban ai tang ïa ki briew ba don jingïadei bad ki seng ba don ha ka bor,” la ong u Bah Ardent.
