Shillong, Lber 07
U Myntri Rangbah ka Jylla, Conrad K. Sangma ha ka Sngi Thohdieng u la ong ba ka Sorkar ka kular skhem ban pyntikna haba ïadei bad ka jingpynheh ïa ka Kad Liengsuiñ Umroi bad ka jingpyntreikam ïa ki liengsuiñ na Kad Liengsuiñ Baljek.
“Nga phah ka khubor kaba shai ba ngi kular skhem ban pynbha ïa ki lad pynïasoh lyngba ki liengsuiñ da kaba pyntikna ïa ka jingpynheh ïa ka Kad Liengsuiñ Umroi (na bynta ka jinghiar jong ki liengsuiñ ba kham heh) bad ka jingtreikam jong ki liengsuiñ na Kad Liengsuiñ Baljek,” ong u Sangma haba jubab hapoh Ïingdorbar Thawaiñ ha ka kynta kylli jingkylli.
U la ong ruh ba ka jingïakren ka la jan poi sha ka bynta ba khatduh bad u la pynpaw ka jingkyrmen skhem ba hapoh u snem 2026, yn sa lah ban pyntreikam ïa ki liengsuiñ na Kad Liengsuiñ Baljek da kaba ban jur ba ka kam ka la ïaid sha kata ka bynta.
Na ka liang u MLA ka TMC na Nongthymmai, Bah Charles Pyngrope u la kwah tip la ka Sorkar ka pyrkhat ne em ban khmih bniah ïa ka jinglah ha ka ban pynheh lang ïa ka jaka mareh liengsuiñ (Runway) jong ka Kad Liengsuiñ Baljek na bynta ka jinghiar jong ki liengsuiñ ba kham heh khnang ban kiar na kaei kaba lah ban jia biang kumba long ha Kad Liengsuiñ Umroi.
Haba kdew ba na ka liang jong u, u la buddien ïa kane, u Sangma ha kawei ka liang u la ong ba ka jingkylli kaba la mih haba ïadei bad kane ka bynta ka long halor ka pisa bad ka jinglah ban leh ïa kaba ka Airports Authority of India (AAI) kam da pyni than eh ïa ka jingnoh jong ka ïa kane ka jingtyrwa.
U la ong ruh ba kumta, ki la poi sha ka jingïabeit ba la kumno-kumno yn sdang pyntreikam noh shuwa ïa ki liengsuiñ kiba don 19-20 tylli ki jaka shong watla ka lad ka plie na bynta kiwei-kiwei.
Hashuwa, haba jubab ïa ka jingkylli ba la wanrah da u MLA ka TMC, u Rupa Marak, uba la pynpaw ka jingsngewkhia halor ka jingslem ka jingtreikam jong ka Kad Liengsuiñ Baljek wat hadien 17 snem ba la plie ïa ka, u Symbud Myntri Rangbah ka Jylla ba khmih ïa ka tnad Transport, Bah Sñiawbhalang Dhar u la ong, “Ka Kad Liengsuiñ Baljek ïa mynta kam treikam. Ka Sorkar ka dang ïakren bad ka Airports Authority of India ban pyntreikam ïa ka Kad Liengsuiñ Baljek na bynta ki liengsuiñ kiba don 19-20 tylli ki jaka shong.”
U la ong ba ka don 211.13 akar ka jaka na bynta ban kyntiew bad pynheh ïa ka Kad Liengsuiñ, katba 153.13 akar la shim hapdeng u snem 1986-1989, kumjuh 175 B-3 K-14 L kaba ïaryngkat bad 58 akar ha ka 21tarik Naitung, 2014.
“La pynlut T.3,57,97,775 na bynta ka jingshim jaka haduh mynta haba ïadei bad ka jingkyntiew ïa ka Kad Liengsuiñ,” u la ong.
Shuh shuh u Bah Dhar u la ong ba ka Sorkar Jylla ka la pdiang ïa ka jingtyrwa ban shim shuh ïa ka jaka kaba 68 akar.
“Ngi dang ap ban ïa jurip lang bad ka AAI hashuwa ban shim shuh ïa ka jaka namar ka 211 akar kam pat biang,” u la ong.
Haba kdew ba ka Sorkar ka minot ban pyntikna ïa ka jingtreikam jong ka Kad Liengsuiñ, u Bah Dhar u la ong, “Ngin sa shim shuh ïa ka jaka kaba 68 akar, bad tang ynda la dep ïa kane, ngin sa sdang pynheh ïa ka Kad Liengsuiñ.”
Katkum ka jingpynsngew jong u, ka rai ban shim shuh ïa ka jaka ka la wan hadien ba ka AAI ka la pynpaw ïa ka jingbym kwah ban pyntreikam ïa ki liengsuiñ kiba rit.
