Jowai, Lber 07
Ka long kaei-kaei kaba sngewthamula ban peit bad ïohi ba ka Assam ka ïeng rangbah kum u khla ban tei bad shna jingshna ha ki jaka ïa-ka-jia pud katba ka Meghalaya pat kam nud satia ban tei ne shna ha kine ki jaka bad tang shu saham ka Jylla Assam ka pynjem noh mar-mar.
Ïa kane la ong da ki nongshong shnong ka Mukroh, West Jaiñtia Hills District kaba don markhap bad ki Shnong Pnar jong ka Block -I hapoh West Karbi Anglong District, Assam hadien ba ka Assam lyngba ka Karbi Anglong Autonomous Council (KAAC) ka la sdang ïa ka jingshna surok ha ka kyntoit Umsalang jong ka shnong Mukroh naduh u bnai Naiwieng mynshem snem bad ïai bteng haduh mynta-mynne.
Hadien ba la ïoh jingtip halor jingshna surok da ka KAAC, ki nongïalam jong ka Dorbar Shnong Mukroh ki la ai jingujor mardor sha ki bor pynïaid distrik ka West Jaiñtia Hills ban dawa pynsangeh noh ïa kitei jingshna surok hynrei la saw bnai kynthih, ka jingshna surok ka dang ïaid shaid-shaid haduh kane ka sngi.
Halor kane, ki bor pynïaid distrik ki la phah jurip ïa katei jingshna surok da u Executive Magistrate, Bah G.H. Passah, MCS bad na ka liang jong u ruh u la pynlong ïa ka jingjurip. Ha ka jingjurip, u Bah Passah u la shem dalade ïa ka jingshna surok bad la ïohi ruh ïa ka jingpynkhuid ïa ka khlaw bad jingpynmadan ïa ka khyndew bad jingpom dieng.
U Secretary jong ka Dorbar Shnong Mukroh, Bah Precious Sten u la ïathuh, ym tang ba ka Assam ka shna surok, hynrei la pynkhyllem ruh ïa ki dieng hapoh ki jaka rep jong ki nongshong shnong ka Mukroh kaba dei shibynta jong ka projek ban kyntiew ïa ka jaka rep slasha.
U la ïathuh ba na katei ka jingshna surok, la don 45 tylli ki longïing jong ki nongshong shnong Mukroh kiba don ki jaka rep lane pyntha kba ha katei ka jaka ba shna surok bad thombor da ka Assam, bad na kitei, 6 tylli ki longïing dei kiba la shah ktah ki jaka rep ki jong ki, kiba kynthup ka jaka jong ka Bianda Shadap, Embhahlang Lamin, Shidalin Biam, Kopbiang Dkhar bad Bial Nartiang.
Shuh shuh, u Bah Sten u la ïathuh ba na ka liang ki bor distrik ka West Jaiñtia Hills ka la pyntip sha ki nongïalam shnong ba ka la phah jingthoh sha ki bor pynïaid jong ka West Karbi Anglong District ban sangeh noh ïa baroh ki jingtei bad ban pynneh ïa ka ‘status-quo’ kumba la ïa kut ha shuwa kumjuh ban weng noh ïa kino-kino ki jingtei be-aiñ jong ka Assam hapoh ka Shnong Mukroh hynrei ka Sorkar Assam kam shym la pynsngap satia bad ïaid shakhmat ïa ki jingtei.
U la pyntip ruh ba ki nongïalam jong ka Dorbar Shnong Mukroh haduh kine ki sngi ki ïai bteng ban leit ud leit kyrpad ïa ki bor Sorkar ban pynsangeh ïa ka jingleh jubor ka Assam hapoh ka shnong Mukroh, hynrei kaba sngewsih u la ong ba na ka liang ka Sorkar Meghalaya kam shym la shimkhia halor ka jingeh jong ka Mukroh.
