Shillong, Lber 07
Kawei ka samla Khasi ka la lait phet na tyrsim ki nongkhaïi ha ka por ba ki dang kit ïa ka hapoh kali ban leit die sha kawei ka jaka kaba kham kyndong ynda ka la poi sha nongbah Delhi ha ka 7 tarik Lber 2025.
Kane ka samla ka dei kaba la mih na shnong kaba hap ha East Jaiñtia Hills district bad shong da ka rel ha ka 5 tarik mynta u bnai bad poi sha nongbah Delhi ha ka 7 tarik ha ka por mynstep.
Ka jingthmu jong kane ka samla ban leit sha Delhi ka long ban leit trei bylla hadien ba ka la ïoh ka jingkular ai kam ki briew na Delhi lyngba kawei ka kynthei kaba sah ha Meghalaya ka bym dei Khasi.
Haba kine ki briew kiba kular aikam ki la wan shaw na stetion rel na Delhi hynrei haba ka la poi sha ki jaka ba kham kyndong, kine ki briew kim shym dei kiba aikam hynrei ki la ïakren ‘phone’ ban tyrwa die sha kiwei ki briew ha ka dor kaba rem.
Kumta da ka jingshlur kane ka samla ka la hiar napoh kali ba ka shong ha ka por dheng kali ban mareh kulmar ban pan jingïarap na kawei ka auto rickshaw ban pynpoi ha jaka ba don ki pulit.
Ynda ka la ïoh ban phet ka la ïoh ban pyntip sha ki nongïalam ka Khasi Students’ Union (KSU) Delhi Unit bad la ïoh ban leit shaw ïa ka na katei ka jaka ba ka la ïoh phet.
Ban pynthikna ïa kane ka jingjia, U Nongsaiñ Hima na Shillong u la ïoh ban ïakren da ka phone bad ka President ka KSU Delhi Unit ka samla Marbiang Khongwir.
Na ka liang ka samla Marbiang ka la kyntu ïa ki samla haba ki kwah ban leit trei shabar ka jylla ki dei ban da husiar bad kylli shwa ba kin mih napoh ka jylla khnang ban ym buh jingeh ïa ki bad ïa ki bahaïing bahasem.
Ka la pynpaw ba ka seng KSU Delhi Unit ka kloi beit ban ïarap ïa ki samla kiba donkam ka jingïarap.
Shuh shuh, ka la pyntip ba kane ka samla ka ju trei ïing briew ha Nepal hynrei haba ka la wanphai ka la mut leit trei ïing briew sha Delhi.
